Chenàbura 31 de ghennàrgiu est cumintzada sa de 131 editziones de su Torneu de sas Ses Natziones de rugby.
Sas primas tres partidas ant bidu sa vitòria de sas iscuadras de domo, chi ant otènnidu totus tres su puntu de bonus pro àere marcadu prus de tres metas.
Sa natzionale frantzesa at dominadu su Galles, chi at sighidu a illonghiare su primadu negativu de derrotas a fila a pare in su torneu, como lòmpidas a 13.
Sos meres de domo ant ammustradu galu una borta su balore de su capitanu, su medianu de mìschia Dupont.
Sàbadu in Edimburgu s’Iscòtzia, a pustis de àere cumintzadu bene, s’est fata sighire dae s’Itàlia, renessende però a illonghiare torra e a bìnchere in manera bastante neta. Protagonista in su bene e in su male su capitanu Russel, su medianu de abertura chi at postu in màrtzia s’iscuadra e a su matessi tempus s’est fatu intertzetare unu passàgiu chi at permìtidu a s’Itàlia de marcare sa meta de su parègiu.
Sa partida prus ecuilibrada s’est bida, semper sàbadu, in Dublinu, in ue s’Inghilterra at impignadu s’Irlanda, campione in càrriga. Sos giogadores in màllia birde però a sa fine ant otènnidu una vitòria meritada pro more massimamente de sos tres neozelandesos ecuiparados, su medianu de abertura Gibson-Park e sos trescuartos Aki e Lowe. A los dirìgere su tècnicu Easterby, chi at leadu su postu de s’inglesu Farrell, impignadu ocannu cun sos British&Irish Lions, sa seletzione de sos mègius giogadores de sas ìsulas britànnicas, chi in s’istade ant a èssere in tournée in Austràlia.
Custos sos resurtados: Frantza-Galles 43-0, Iscòtzia-Itàlia 31-19 e Irlanda Inghilterra 27-22.
Ocannu ant introduidu sa novidade tècnica de s’espulsione temporànea, giai adotada in sos test match de s’atòngiu coladu. Su giogadore santzionadu lassat s’iscuadra cun un’òmine de mancu e colados binti minutos de inferioridade numèrica est sostituidu.
(gianni muroni)
Leave a comment