Est dae deghe dies chi sa polìtica italiana est in cuntierra pro s’arrestu in Torinu e s’iscapòngiu sighidu de Najeem Osema Almasri Habish, una de sas figuras chi gestit s’emigratzione in Lìbia.
Almasri est sa ghia de sa politzia giuditziària lìbica, chi ammanìgiat sas galeras chi impresonant sos migrantes chi lompet dae s’Àfrica a su Paisu mediterràneu cun s’ispera de suprire a Europa. Sa comunidade internatzionale ischit chi intro de cussos logos sos deretos umanos sunt cantzellados e sas persones sunt turmentadas in onni manera. Almasri est unu de sos responsàbiles prus mannos de custu sistema e tando sa Corte Internatzionale de Giustìtzia at dadu su cumandu de lu arrestare.
Almasri fiat in Europa dae su 6 de bennàrgiu: at inghitzadu cun una bìsita a Londra, su 13 fiat in Brussellas, dae in ie est andadu a Germània e in cue est istadu firmadu dae sa polìtzia, chi at registradu su nùmene suo, ma no l’at arrestadu. A pustis, semper in Germània, at nolegiadu una vetura pro bènnere a Itàlia, in ue est lòmpidu su 18. Sa politzia de Torinu, pròpriu cussa die, at compidadu sa vetura e at iscobertu chie l’aiat leada, su note de su 19 l’ant arrestadu. Tres dies a pustis l’ant iscapadu e postu in unu bolu militare e batidu in presse a Lìbia.
Chie l’at liberadu? Su Ministèriu de s’Internu pro mèdiu de sos servìtzios segretos. Nòrdio nde ischiat carchi cosa? Forsis, ma sos arrestos de custa genia non depent semper colare dae isse. Comente mai sa Corte de Giustìtzia no at dadu s’òrdine dae deretu? Ca no ischiat chi Almasri fiat in Europa, cando sos tedescos bi l’ant naradu, sa Corte s’est mòida. Su sèberu de lu fàghere ghirare a sa lestra est istadu polìticu, no b’intrant nudda cun sos mecanismos legales o àteru, ma sa Meloni no lu cheret atrogare e s’opositzione l’est atachende.
S’acontèssida est grae, ma costoit unu segretu chi segretu no est, ma chi paret chi nemos chèrgiat iscobiare a craru. Sa polìtica contra a sos migrantes de s’Itàlia est dae tempus maicantu chi tenet fundamentu in su sistema de galeras lìbicas: nois pagamus, e meda puru, sos che Almasri pro tènnere firmos in cale si siat manera sas persones chi cherent intrare a Europa. E non dae como, ma dae su guvernu Gentiloni de tzentru manca, in su 2017. Lìbicos chi impitat custos meschinos e sa timoria nostra pro nos ricatare e otènnere su chi cherent issos, bastat pompiare comente sunt cambiados sos nùmeros de sos isbarcos in sas dies chi Almasri fiat in presone pro àere una proa (incarca inoghe).
Sos mortos in mare, sas fèminas violadas, sas persones turmentadas e ochidas, sos afogados in su mare sunt responsabilidades nostras. Non sunt acontèssidas capitadas, ma est su seberu fatu pro arressare sas migratziones. Sa neghe est de sa polìtica italiana intrea, de tzertu, ma sas manos nostras sunt netas?
Gabriele Tanda
Leave a comment