Est nàschidu su 1983 ma su currìculum suo est de una richesa rara. Semus faeddende de Battista Biggio, ingegneri carlofortinu espertu de seguresa informàtica (mescamente aplicada a s’IA), co-fundadore de s’azienda Pluribus One e dotzente in s’Universidade de Casteddu (dipartimentu de Ingegneria elètrica e eletrònica).
Medas sunt sas chircas e sas publicatziones suas in contu de machine learning, est a nàrrere cussa parte de s’Intelligèntzia Artifitziale chi pertocat s’aprendimentu automàticu de sas màchinas dae sos datos, e su megioru issoro pro mèdiu de s’esperièntzia direta; sos traballos chi at produidu sunt gasi de importu chi s’Institute of Electrical and Electronics Engineers – s’organizatzione mundiale prus manna dedicada a sa crèschida tecnològica in sos campos ingegnerìsticos – l’at cunferidu su tìtulu de IEEE Fellow dae su 2025.
Reconnoschimentu mannu a beru, sende chi petzi a su 0,1% de sos membros de s’Institute of Electrical and Electronics Engineers lu sèberant pro li dare ondra cun custa insigna.
Parte de sa generatzione chi sa tecnologia la manigiaiat dae minore, su prof. Biggio est pàschidu gioghende cun su Commodore Amiga 500, computadore protagonista de un’època chi at bidu sa rivolutzione informàtica. E custa passione nàschida cando fiat una criadura non s’est mai minimada; a s’imbesse, s’est afortida e sos traballos suos, paris cun s’atividade de dotzente, sunt un’icona de primore.
Una cumponente de importu de sas chircas de Biggio in contu de seguresa aplicada a s’IA est s’adversarial machine learning, est a nàrrere cussa disciplina chi punnat a isvilupare màchinas chi potzant funtzionare in un’ambiente contràriu, adversarial naramus, in ue b’at sugetos cun intentziones malèsigas. Est cosa nòdida, difatis, chi fintzas sas màchinas – e duncas finamentas tecnologias comente ChatGPT – podent àere allutzinatziones, e un’atacante tenet sa possibilidade de las ingaddinare manipulende sos datos de intrada. In custos casos, est pretzisu a immaginare sas cunsighèntzias deletèrias: pensemus, pro nàrrere, a unu modellu de intelligèntzia artifitziale chi depet reconnòschere e distìnghere ogetos ma s’ingaddinat e si faddit pighende una sìndria pro una botza de giogu. Unu malintentzionadu podet provocare s’errore pro mèdiu de perturbatziones chi s’ogru umanu non resesset a bìdere, cajonende dannos e confusione.
Como s’ingegneri carlofortinu est impignadu in su panorama de sas chircas e de progetos chi pertocant s’àmbitu europeu e cussu italianu-sardu. Dae pagu at bidu sa lughe su sAIfer Lab, laboratòriu chi punnat a sa seguresa de s’Intelligèntzia Artifitziale, nàschidu dae sa collaboratzione intre s’Universidade de Casteddu (su Pra Lab) e sa de Gènova (su SmartLab). Cun prus de 70 collaboradores, partètzipat a duos progetos italianos finantziados dae su PNRR. Tres, imbetzes, sunt sos progetos europeos: CoEvolution, ELSA e Sec4AI4Sec, totus finalizados a sa chirca e a s’isvilupu de solutziones avantzadas in contu de seguresa informàtica e IA, ma finamentas cun sa punna de fraigare una rete chi, conca a s’Europa, potzat agiudare aziendas e istitutziones pro un’impreu de s’Intelligèntzia Artifitziale seguru e in lìnia cun sos regulamentos.
Cun una base forte de istùdiu e collaboratziones de importu mannu, Battista Biggio sighit a traballare contribuende, paris cun su grupu suo, a fàghere de sa Sardigna unu tzentru de etzellèntzias in su panorama tecnològicu mundiale.
Gianfranca Orunesu
Leave a comment