Su Papa at abertu sa Ghenna Santa in sa Basìlica de Santu Pedru, eris 24 de nadale, a sas sete de sero. At fatu cumintzare de gasi su Giubileu. A coa at fatu sa missa de Pasca de nadale.
Cun su Giubileu pro un’annu sa Crèsia cuntzedet indulgèntzias a sos fideles, segundu una traditzione ereditada dae s’ebraismu.
Su de ocannu est su de trintunu Giubileos in s’istòria de sa Crèsia Catòlica. Su primu est istadu su de su 1300, chertu dae Bonifàtziu VIII.
S’annu giubilare cumintzat a su sòlitu carchi die in antis de sa fine de s’annu solare, est a nàrrere dae una Pasca de nadale a s’àtera.
E de gasi est istadu pròpiu in cudda ocasione chi su pontìfitze aiat postu in fatu a una traditzione cumintzada cun su perdonu de Assisi in su 1216 e cun sa perdonàntzia de s’Aquila in su 1294.
Su Giubileu de su 2025 est dedicadu a s’isperàntzia. Spes non confundit est su nùmene de sa bulla chi dd’at promulgadu, su 9 de maju coladu. “In signale de isperàntzia s’apòstulu Pàule ponet ànimos a sa comunidade cristiana de Roma”, narat su documentu.
De s’isperàntzia at faeddadu meda su Papa in sa prèiga. “De isperàntzia tenimus bisòngiu, tenimus bisòngiu totus”, at naradu. E galu: “custa est sa note chi Deus narat a ognunu de nois: ddo’at isperàntzia pro te puru”.
No est mancadu unu riferimentu a sas suferèntzias de sas gherras e massimamente a sos pipios mortos a mitràllia.
Papa Frantziscu at a abèrere puru, su 29 de nadale, sa ghenna santa de sa basìlica de Santu Giuanne in Lateranu, sede de su pìscamu de Roma, sa die de annu nou sa de de Santa Maria Majore, su 5 de ghennàrgiu sa de Santu Pàule extramuros.
Pro otènnere s’indulgèntzia tocat a andare a missa in una de sas crèsias seberadas dae sos pìscamos comente logos sacros giubilares, partetzipare a totu sas tzelebratzione e a si comunigare.
(gianni muroni)
Leave a comment