Sa pellìcula de animatzione Robot Dreams, chi su tìtulu italianu est Il mio amico robot, at bintu sa de deghennoe editziones de su Sardinia Film Festival.
Su regista est Pablo Berger, nàschidu in Bilbao in su 1963. A pustis de s’esòrdiu, in su 1988, cun su curtzumetràgiu Mamá, su regista bascu at realizadu videoclip e longumetràgios, lompende a partetzipare a sos prèmios Oscar cun Blancanieves, in sa categoria de mègius filmi in limba no inglesa.
Il mio amico robot est sa prima pellìcula animada sua e est istada candidada, custa puru, a sos ùrtimos Oscar. Est su contu de unu cane de sa Nova York de sos annos ‘80 de su sèculu coladu chi si faghet unu robot pro tènnere un’amigu. Sa caraterìstica printzipale est chi non ddo’at chistionos, su filmi est mudu, acumpangiadu dae sa mùsica ebbia.
Berger at chertu rapresentare in tzìnema su contu a fumetos de s’americana Sara Varon, publicadu in su 2007.
Su Festival de ocannu est istadu dedicadu a s’animatzione e at tentu a teatru su Cityplex Moderno de Tàtari, cun bator dies de programmatzione, dae su 6 a su 9 de santandria, dedicadas a unu pùblicu de istudiantes de iscola.
Sos àteros filmis in cuncursu fiant: Le avventure del Piccolo Nicolas, de Andine Fredon e Benjamin Massoubre, Flow, de Gilt Ginbalodis, Linda e il pollo, de Chiara Malta e Invelle, de Simone Massi.
Ant projetadu puru duos curtzumetràgios: Ojo, dedicadu a sas istàtuas de Mont’e Prama, e Blu, de Michela Anedda, fatu in stop motion.
In antis de sas dies de programmatzione ddo’at àpidu unu laboratòriu de animatzione de sas sorres Monica e Valeria Tronci chi ant traballadu una chida cun sas classes III A e III B de s’iscola primària de su Canopoleno de Tàtari.
Su resurtadu est istadu sa realitzatzione de duos vìdeos curtzos, cun protagonistas sos monumentos e sos sìmbolos tzitadinos, fatos cun sa plastilina e sa tècnica de sa stop motion.
(gianni muroni)
Leave a comment