Su 25 de santugaine in Portu Turres ammentant sa dies natalis de su santu chi dat su nùmene a su mese, comente patronu de sa bidda, cun sa missa narada dae mussegnor Salvatore Masia, in sa crèsia de Balai atesu, a sas noe de mangianu.
A coa, s’assòtziu Etnos, cun sos cadderis e su grupu Li Bainzini, paris cun àteras rapresentàntzias in bestimenta sarda traditzionale, at a calare a su mare de Balai, in dae in antis de sas barcas de sos sòtzios La Prana e Asso.Ve.La. In ie sos caddos ant a intrare in abba in signale de devotzione pro sos màrtires turritanos. Mussegnor Masia at a beneìghere sos presentes.
A prus de sa parte religiosa ddo’at a àere eventos profanos puru pro afestare su santu.
In sa basìlica, dae sas oto de sero, ddo’at a àere sa de noe editziones de Polifonia e Traditzione in sa Musica Sacra, organizada dae Associazione Complesso Musica Antiqua, cun Complesso Musica Antiqua, coro de Nulvi e coro Boci d’Agliola de Telti, e in prus sa de deghe editziones de su festival Melos, organizada dae su Centro Studi Saser, cun su Duo Mistral.
Sos apuntamentos cun Etnos sighint su 26 e su 27 in su palatzu Paglietti. Su 26 dae sas 11,30 a sas 20,00 ddo’est sa mustra de bestimenta traditzionale Siendi di Sasdhigna e sa mustra fotogràfica AЯE de Alessandra Garau, chi at ant a èssere replicadas sa die in fatu dae sas 10,00 a sas 20,00.
Semper su 26, in su matessi logu, a sas 18,00, est previstu su cunvegnu Tradizione, moda e funzionalità: l’abbigliamento sardo maschile fra Ottocento e Novecento.
(redatzione)
Leave a comment