Si ischit pagu a beru de custa limba, ca sos testos romanos chi protzediant dae África e sas iscritziones ufitziales fiant petzi in latinu clàssicu, mancari b’apat proas indiretas de su fatu chi una limba romanza africana si fiat evòlvida dae su latinu vulgare de cada die chi si faeddaiat in custa regione, e chi pustis custa limba l’aiant abbandonada, cun sa espansione musulmana in su nord de África, in favore de s’àrabu.
LIMBAS RELATZIONADAS
In su sèculu XII su geògrafu magrebinu Muhammad al-Idrisi dat un’informatzione de importu subra de sa Sardigna in su libru suo “Recreu de su disigiosu in sa relata sua a pitzu de tzitades, regiones, paisos, ìsulas, pòpulos e terras larganas”, in ue narat chi “Sos sardos sunt etnicamente Rûm ‘Afàriqah (romanos de África), vivent che a sos bèrberos, non càrculant sas àteras natziones Rûm; custu pòpulu est animosu e balente, e mai lassat sas armas”.
Austinu de Ipona narat finas chi “Sos sonos africanos non faghent distintzione peruna intre vocales curtzas e vocales longas”. Custu cuncordat cun s’evolutzione de sas vocales latinas in s’idioma sardu, in ue mantenet sos timbros de totu sas vocales e in manera sintzilla lassat a un’ala sa cantidade, in prus de monotongare totu sos ditongos latinos. In prus b’at testimonias anteriores similares subra de su faeddu de unos cantos romanos de orìgine africana, chi nat chi non distinghiant sas vocales longas dae sas curtzas.
In congruos, mancari non b’apat testimonias medas de sa limba romanza africana, sos caràteres suos permitint de istabilire una relatzione linguìstica cun su sardu, chi duncas si diat pòdere classificare comente limba romanza insulare. De veras, unos cantos linguistas, che a su filòlogu Heinrich Lausberg, ant propostu de classificare su sardu comente s’ùnicu rapresentante biu de sas limbas romanzas insulares, chi unu tempus nde faghiat parte su romanzu africanu, gasi comente su corsicanu antigu chi si faeddaiat in antis de sa toscanizatzione de s’ìsula.
LIMBAS RELATZIONADAS