S’euskera o bascu est s’ùnica limba paleoeuropea chi at supravìvidu a sas immigratziones indoeuropeas. Est sa limba traditzionale de sos bascos, con unos cantos 800.000 faeddadores nativos. Est una limba isulada, chi s’orìgine sua est galu in arresonu.
In Ispagna s’euskera est ufitziale, in pare cun s’ ispagnolu, in sa Comunidade Autònoma de su Paisu Bascu e in sa Comunidade Forale de Navarra, cando chi in Frantza si faeddat in una parte de su dipartimentu de sos Pirineos Atlànticos sena status ufitziale. B’at finas comunidades bascòfonas in su disterru bascu, mescamente in Amèrica.
S’euskera batúa (bascu unificadu) est sa forma istandard de s’ euskera e servit comente registru formale e iscritu. Est sa variante de s’euskera chi si impitat pro s’ Amministratzione pùblica, s’insinnamentu e àteras istitutziones formales, e est sa prus impreada in sos mèdios de comunicatzione e in sa literadura. Sas normas de custu istandard las at formuladas sa Real Academia de la Lengua Vasca a pustis de su Cungressu de Aránzazu de su 1968. Semper e cando s’euskera batúa cunvivet cun sos dialetos de s’ euskera.
Su bascu faghet parte de sas limbas presentes in Google Translate.
