Un’istudiosa de euskera, un’espertu de grecànicu, unu giornalista chi at dadu logu a su sardu in sa Rai e una comunidade intrea chi parat fronte in sa resistèntzia linguìstica.
Sunt sos binchidores de su Prèmiu Ondras 2024, bogadu a lughe dae Crei Acli e Fondazione di Sardegna, pro su promovimentu de sas limbas minoritàrias europeas.
Sa manifestatzione, nàschida pro reconnòschere s’impinnu sotziale e polìticu in campu internatzionale pro su promovimentu e s’avaloramentu de sas limbas prus pagu difusas, est in programma sàbadu 26 de santugaine 2024 a sas 6 de sero in Casteddu, in sa Manifattura Tabacchi.
Su mangianu, a sas deghe e mesa, b’at, in càmbiu, un’addòviu cun sos giornalistas pro crarire sas resones de su prèmiu.
Sos binchidores de s’Editzione 2024 sunt: Castillo Suarez Garcia, (iscritora e filòloga basca, acadèmica de sa Euskaltzaindia, s’Accadèmia Reale pro sa Limba Basca), Pantaleone Danilo Brancati (rapresentante de importu de sa comunidade grecànica de Itàlia), Francu Siddi (giornalista e cussigeri de amministratzione RAI dae su 2015 a su 2018) e sa comunidade de Orgòsolo (ghia in sa resistèntzia in s’impreu de sa limba sarda). A seberare sos nùmenes est istada finas ocannu sa cummissione de espertos sardos formada dae Giosepe Coròngiu, iscritore e ativista de istèrrida longa in sas batallas linguìsticas, Nicolò Migheli, sotziòlogu e autore de trasmissiones radiufònicas Rai in sardu, e Maria Antonietta Piga, giornalista televisiva, revisora de testos e esperta de limba e polìticas linguìsticas.
Narat Màuru Carta, presidente regionale de sas Acli: “Sas Acli de Sardigna dae semper ant carculadu sa limba sarda e est bellu chi oramai dae unos cantos annos resessimus a dare logu e s’importàntzia chi lis deghet finas a sas àteras gasi naradas limbas minoritàrias. Sos premiados de ocannu mustrant comente su traballu subra de sas limbas si podet fàghere in maneras e diretzones diferentes, ma finas comente una limba, in Orgòsolo, podet devènnere un’elementu identitàriu de importu.”.
