Bitzi, Lodè, Lùvula, Onanie, Orune, Osidde, Pasada, Thiniscole e Torpè sunt sas 9 biddas de s’Unione de sos Comunes de su Monte Arvu. E fintzas ocannu sunt parte de su progetu “Locos de Cultura”, finantziadu dae sa Regione in intro de sos interventos pro sa tutela de sa limba e de sa cultura sarda (in atuatzione de sas leges 22/2018 e 482/1999) e lòmpidu a sa segunda editzione. Che a s’annu coladu, s’Unione at aprontadu materiale multimediale pro mustrare unu logu pro cada bidda. A custas prendas, como, las agatamus in su situ de su progetu (locosdecultura.it), in unu vìdeu, in unas cantas fotografias, in sos pannellos de allumìniu chi ant a pònnere in sos tretos dèghidos e in una brossura. Sos logos contados in sardu custos sunt: su “Museu de sos massajos e de sos pastores” de Bitzi; sa “Cala de sos naneddos de Janna Oriavula” de Lodè; sa “Creja de sos Ànzelos” de Lùvula; su “Novenàriu de Santu Bachis” de Onanie; sa “Creja de Santa Maria” de Orune; sa “Tumba de sos gigantes de Sa Raighina” in Osidde; sa “Turre de Santu Juanne” de Pasada; sa “Tumba de sos zigantes de Su Picante” in Thiniscole; su “Museu tzìvicu” de Torpè. Sa presentatzione pùblica est programmada pro mèrcuris su 2 de santugaine, a sas 5 de borta de die in sa sala consiliare de s’Unione de sos Comunes de su Monte Arvu de carrera de Isalle, in Thiniscole. A sa presentatzione b’ant a pigare parte sos dipendentes de s’Àrea amministrativa de s’Unione de sos Comunes, s’operadora audiovisiva Silvia Punzo, su fotògrafu Alex Cucchi e sa giornalista Mariantonietta Piga, autora de sos testos.
Gianfranca Orunesu
(Foto de Alex Cucchi)
Leave a comment