A ite servit sa memòria? A tènnere s’informatzione netzessària pro prevìdere su tempus venidore, in una manera evolutivamente curreta e profetosa. Sos mecanismos chi impitat su cherbeddu pro immagasinare sos datos sunt medas e diferentes, però in essèntzia totu su chi faghet est a collire sas istatìsticas de sas cosas chi acuntessent in su mundu; est a nàrrere, sas probabilidades chi carchi cosa càpitet, mescamente sas relatziones causales intre sas cosas, de càusa e efetu. Su cherbeddu nostru e su de sos àteros animales sunt disinnados in manera perfeta pro s’abbigiare chi sas càusas tenet unu efetu, e de custu, si bi pensamus bene, non si nde podet fàghere a mancu pro valutare su chi at a acuntèssere in su tempus venidore. Si castiamus su relogiu e bidimus chi lompimus a tardu a s’aeroportu, carculamos cun una seguresa de su chentu pro chentu chi cras no amus a impojare in su mare de sas Canàrias.
Però, in prus de caturare su mundu in una manera fidele e istatìstica, sa memòria est super importante pro nois ca sos ammentos nostros sunt s’identidade nostra. Custu lu cunstatamus in manera dolorosa cando unu custrintu sufrit de alzhéimer, e a bellu a bellu si ismèntigat de sas cosas e de sas pessones, e sa personalidade sua, s‘identidade sua, isvanesset in dae in antis de sos ogros nostros. Custa casta de esperièntzia clìnica mustrat chi nois non semus àteru si no su modellu de su mundu chi tenimus in su cherbeddu, in ue, si bidet, b’at una parte chi si referit a sa carena nostra e a sa vida nostra; cando si disìntegrat su modellu, nois iscumparimus. Però, pro dare unu tonu prus positivu a custa idea, su contràriu acuntesset cun sos pitzinnos minores: cunforma a su chi connoschent die cun die, su modellu issoro de su mundu si isvilupat e issos si faghent pessones mannas.
