Sos istados de sa Unione Europea ant detzìdidu a s’unanimidade de eliminare totu sas proibitziones a s’esportatzione de petza de porcu dae sa Sardigna. Sa revisione de su regime de regionalizatzione de sa UE est istadu adotadu dae sa Cummissione Europea lunis 23 de cabudanni.
Dd’at deliberadu su Comitadu Matas, Animales, Alimentos e mangimes de Bruxelles, cantzellende sas dispositziones previstas dae su regulamentu de esecutzione 2023/594.
Sa peste suina africana est cunsiderada irraighinada de su totu dae s’Ìsula giai dae su 2023 e custu atu est sa cunfirma definitiva. Sa detzisione de sa Cummissione balet pro s’Isvètzia puru, chi però, in cunfrontu a sa Sardigna, at tentu dannos mìnimos. In s’istadu iscandinavu aiant atzapadu unu sirbone mortu ocannu passadu, ma a pustis non ddo’at àpidu prus peruna signalatzione.
Sa Coldiretti Sardigna, cun su presidente Cualbu e su diretore Saba, at saludadu cun favore sa nova, ammentende totu sos isfortzos fatos custas dècadas dae sos sardos a livellu polìticu, sena de diferèntzias partìticas, sena de ismentigare sos sacrifìtzios de sos porcàrgios, pro pòdere lòmpere a custu resurtadu.
Su problema como però est chi sa peste suina est presente in arta Itàlia. Sa Coldiretti sarda pedit pro custu chi siant fatos controllos sèrios pro sa petza chi benit dae continente, sèrios che a sos chi annos e annos ant fatu pro sa petza sarda.
Sa maladia fiat lòmpida a Sardigna in su 1978 e s’ùrtima rasta de su virus dd’ant agatada in su 2019. In s’Ìsula est presente su 2% de su patrimòniu suinìculu de totu s’istadu, cun unos 160.000 porcos registrados.
Custa genia de peste suina chi at tocadu sa Sardigna est bènnida dae Àfrica e in sos annos chimbanta de su sèculu coladu at passadu su mare, arribende a Europa, a sa penìsula ibèrica, in ambos duos sos istados. Dae in ie a coa si nch’est ispainada fache a otzidente.
(gianni muroni)
Leave a comment