Sunt tropu sos chi nde sunt cumbintos: bator pessones subra de chimbe (e finas su 65% de sos operadores sanitàrios e assistentziales) pensant chi sa demèntzia siat una parte normale de s’imbetzada. Lu narat su raportu mundiale “Alzheimer 2024”, cunforma a su cale creschet, però, sa cussèntzia de s’importàntzia de s’istile de vida.
Su tìtulu de su raportu est “Cambiamentos globales in sas atitùdines chirru a sa demèntzia”, publicadu dae “Alzheimer’s Disease International”, Adi. Su traballu, fatu dae sa “London School of Economics and Political Science” intervistende 40mìgia sugetos (pessones cun demèntzia, badantes, personale sanitàriu e pessones comunas) de 166 paisos, at mustradu chi, foras male, s’80% de sos chi ant torradu imposta pensat galu, faddende·si, chi sa demèntzia siat un’acuntèssida normale cando si imbetzat, e no una cunditzione mèdica, cun un’aumentu de su 14% dae s’ùrtima incherta fata in su 2019. Sa pertzentuale est de su 65% in sos operadores sanitàrios e assistentziales (+3% a cunfrontu de su 2019).
A cummentare custos resurtados b’est Paola Barbarino, presidenta de “ Alzheimer’s Disease International”. Issa narat chi «Custa visione impretzisa de sa demèntzia est unu de sos oriolos prus mannos, in particulare de sos operadores sanitàrios, ca podet fàghere istentare sa diàgnosi e s’atzessu a su tratamentu, a s’assistèntzia e a su suportu chi bi cherent. Custu est acuntessende in unu mamentu chi sunt essende a campu tratamentos noos in fase de aprovatzione in totu su mundu, in pare cun iscobertas in su campu de sa diagnòstica».
