de Salvatore Serra
Go!azen est una sèrie televisiva musicale de ETB 1, produida dae Pausoka Entertainment e EiTB. Sos protagonistas sunt giòvanos. Sa limba est s’euskera. Duncas, giòvanos bascos chi faeddant e cantant in bascu. A sa prima, in su 2008, fiat essida una pellìcula pro su tzìnema. Pustis, in su 2009, EiTB aiat torradu a trasmìtere custa pellìcula in televisione. Sigomente b’at àpidu una resessida manna, ETB at bogadu a campu in su matessi annu sa sèrie Go!azen 2.0, cun su prus de sos pessonàgios de sa pellìcula. Colende sos annos, in su 2016 ant rennovadu sa sèrie, cun su nùmene Go!azen 3.0 e cun pessonàgios noos. E gasi ant sighidu, sena parare mancu in su cunfinamentu de sa pandemia, in ue sos pessonàgios comunicaniant dae remotu, finas a lòmpere a s’istajone 11, chi ant cumintzadu a la registrare in làmpadas de su 2024.
Sa finalidade de custa sèrie est a mustrare su bascu comente una limba normale, chi sos giòvanos lu faeddant senza cumplessos e sena problemas; in prus issos torrant a propònnere, cun coreografias galanas, sas cantzones bascas prus famadas. Custas esibitziones si podent agatare in youtube, e chie si siat podet iscumproare s’entusiasmu e sa valentia de custos giòvanos, chi mustrant cantu podet èssere bia e in possa una limba “minorizada”.
Ligàmenes:
https://www.youtube.com/watch?v=r1jRq4DVMF0
https://www.youtube.com/watch?v=NXhbGEbV6GY
https://www.youtube.com/watch?v=RyexW7EVKL0
https://www.youtube.com/watch?v=iCz1Xs8PpfA&list=PLKE4WT5Uudh3wOSDgd1UeUebh_IW5-uz7
https://www.youtube.com/watch?v=da4kAlpSSG8&list=PLKE4WT5Uudh3wOSDgd1UeUebh_IW5-uz7&index=4
Leave a comment