“Sas Bàtoro Colonnas” de Iscanu, su “Santu Laretu” de Silanos, su “Pòpulu sardu” de Ulìana, sos “Santu Bachis” e “Tottoi Zobbe” de Golothene, “Su Hussertu de Mamujada”, “Sos Bator Moros” de Fonne, “Su Tenore de Lodine”, “S’Arvorinu”, su “Antoni Milia” de Orosei, “Su Tenore Montinu”, “Su cuntratu de Sèneghe”, su “Sa Maddalena” de Silanos, su “Santu Pretu” de Lòcula, su “Janna Bentosa” de Nùgoro e su “Santu Gavinu” de Illorai.
Sunt custos sos grupos de càntigu a tenore chi ant pigadu parte a sa segunda editzione de sa rassigna Isre “In Tzilleri”, aprontada in intro de su progetu “Istèrridas”, comintzada in iscanu su 10 e sessada in Lòcula su 29 de trìulas (colende in Golothene, Lodine, Urtei e Monti). «Apuntamentos periòdicos intre cantores e apassionados – comente at naradu Diego Pani, responsàbile tècnicu iscientìficu de su progetu – pro istare paris e pro li torrare a su càntigu a tenore cussa funtzione sua de aunimentu sotziale, de addòbiu intre sas generatziones abertu a totu cantos, pro si manifestare e pro dare a sas levas noas sa possibilidade de imparare “sa moda” de sa bidda dae sa boghe bia de sos prus mannos e non dae sos discos o dae YouTube ebbia».
E sa possibilidade – finamentas gràtzias a su cuntestu informale – l’ant dada a formatziones noas fatas in cue etotu intre apassionados e cumpetentes. Su pùblicu, grupos de amantiosos atopados a tzilleri, at dadu grandu agiudu a totu custu. S’esperimentu diat pàrrere resèssidu, comente in sa prima editzione de duos annos a como peri sos tzilleris de Patada, Padru, Oroteddi e Durgali.
Narat Bustianu Pilosu, coordinadore de sa rete de su càntigu a tenore: «Semus chirchende de recuperare àteros logos comente sas festas in su sartu, sas barracas in sas festas de sas biddas e àteros cuntestos inue su càntigu s’est isvilupadu e reproduidu».
Gianfranca Orunesu
(Immàgine dae Isre Musica)
Leave a comment