Fiant tres sas sessiones de allega in programma in sa Cunferèntzia natzionale pro s’Isvilupu sustenìbile chi ant fatu in Roma su 21 de làmpadas in pessu coladu. S’apuntamentu ruiat a 50 annos dae su Cunferèntzia de Istocolma e a 30 dae sa de Rio de Janeiro chi, tando, apronteint in contu de ambiente. Ma no una ricurrèntzia ebbia. Ocannu, difatis, diat èssere s’annu de comintzu de s’atuatzione de s’Istrategia natzionale noa pro s’Isvilupu sustenìbile mentovadu (in sigla connota comente SNSvS22). Ma custu 2022 diat dèvere èssere finamentas s’annu chi s’istadu italianu at a dèvere presentare a sas Natziones unidas su programma suo pro sighire sos inditos de s’Agenda 2030. Torrende a sa cunferèntzia, sa prima de sas tres sessiones l’ant dedicada a sa presentatzione e a su cunfrontu in contu de metodologia de traballu e de argumentos de sa SNSvS22. Ma l’ant fintzas dedicada a su protzessu de preparatzione de sa Voluntary National Review (VNR). Su “sistema di attuazione della SNSvS” fiat imbetzes su focus de sa segunda sessione in ue ant tratadu sos àmbitos printzipales de atuatzione de s’istrategia. Est a nàrrere: sa coerèntzia de sas polìticas pro s’isvilupu sustenìbile; sa territorializatzione de sa SNSvS; sos modellos noos de partetzipatzione; su ruolu de sos vetores de sustenibilidade in s’atuatzione de s’istrategia. A concruos ant dedicadu sa de tres sessiones a sa chistione de sa cultura pro sa sustenibilidade cun un’aprofundimentu in contu de educatzione e giòvanos, cun sa punna de favorèssere s’addòbiu intre sas istitutziones interessadas dae su tema. Sa cunferèntzia l’ant aprontada in pare cun su Forum pro s’isvilupu sustenìbile chi, dae comintzu, acumpàngiat s’acumprimentu de sa SNSvS e chi rapresentat belle 200 organizatziones de sas sotziedade tzivile e no istatales.
Gianfranca Orunesu
Leave a comment