Su giùighe federale argentinu Ariel Lijo at detzìdidu de fàghere a connòschere a su pùblicu unu raportu de sa SIDE (Secretaría de Inteligencia de la Presidencia de la Nación), elaboradu dae Miguel Ángel Toma, chi nde fiat segretàriu durante sa presidèntzia de Eduardo Duhalde, intre su 2002 e su 2003.
Su documentu cunfirmat sas responsabilidades de sa Repùblica Islàmica de Iràn in s’atentadu terrorìsticu a s’Amia (Asociación Mutual Israelita Argentina) de Buenos Aires in su 1994.
Dae s’investigatzione essit a pìgiu su ruolu de Samuel Salman El Reda, libanesu e militante de sa formatzione estremista islamica Hezbollah, comente figura tzentrale de s’operatzione.
El Reda, 59 annos, est acusadu de s’atentadu, in ue sunt mortas 85 persones, dae sa giustìtzia de Istados Unidos puru.
Si sos esecutores fiant libanesos, sos mandantes, semper cunforma a custu raportu, fiant iranianos. Sos nùmenes individuados dae Toma, chi in antis de s’incàrrigu in sos servìtzios segretos fiat istadu Minustru de s’Internu cun su presidente ad interim Puerta, sunt Moshen Rabbani e Moshen Rezai.
Rabbani fiat attaché culturale in s’ambasciada iraniana de sa capitale argentina in su momentu de s’atentadu.
Rezai fiat su cumandante de sos Pasdaràn, sos Guardianos de sa Rivolutzione Islàmica, e como faghet parte de s’élite polìtica iraniana comente segretàriu generale de su Cussìgiu pro su Bonu Sentidu de s’Interessu de su Sistema.
Sas investigatziones de s’istadu sudamericanu sunt lòmpidas a su matessi resultadu de cuddas fatas in sos Istados Unidos, comente naradu in antis, e in Israele puru. Su servìtziu segretu de s’istadu giudeu non tenet dùbbiu perunu subra sa retza Hezbollah-Iràn siat pro su chi pertocat s’atentadu in s’AMIA, siat pro s’àteru in s’ambasciada israeliana, semper in Buenos Aires, in su 1992.
(gianni muroni)
Leave a comment