Unu milliardu de tonnelladas de màndigu cada annu. Est su chi ant carculadu de su chi peri su mundu nch’imbolamus a s’arga. Un’isprecu chi est un’ingiustìtzia cunforma a cantos in custu praneta sufrint su fàdigu. Ma chi tenet finamentas cunsighèntzias in contu de incuinamentu, sende chi su chi no est compostadu e nche finit in discàrriga produit gas serra dannàrgios pro s’atmosfera.
Pro limitare custos dannos, chi non bi diant dèvere èssere cun una gestione prus giusta de sa filera alimentare in contu de produtzione e de distributzione, b’at chie est pensende a s’impreu de s’inteligèntzia artifitziale. Comente? Carchi solutzione pertocat s’anàlisi de su chi, in sas coghinas de sos ristorantes e de sos albergos, nche frundint.
Un’aplicativu de Ia postu in sos bidones mentovados est capatze de annotare sa cantidade e calidade de sas partes de màndigu lassadas: cantos macarrones, cantu fasolu etc. Dae cue s’algoritmu elàborat sos datos e dat inditos dèghidos pro chi sos coghineris torrent a modulare sa cantidade de sos ingredientes. Àteros aplicativos los ant aprontados pro sos parastàgios e sos repartos de sos supermercados pro cumprèndere cantos produtos friscos comente ortalìtzia, frùtora, petza, pische e isfurrados tocat a espònnere pro evitare chi una cantidade manna issoro si trasformet in màndigu de nch’imbolare.
Ma si custas solutziones – finas in contu de gestione de sos gastos – pertocant a chie bendet, aplicativos bi nd’at finamentas pro sos consumadores. Unu de custos est To Good to Go, un’app (finas in italianu) pro chi potzamus chircare butegas de alimentares e ristorantes cun prejos bonos pro màndigos chi, in etzessu, nche diant pòdere èssere frundidos. E àteras bi nd’at de app chi resessent a pònnere in cuntatu chie bendet e chie còmporat. Semper cun sa matessi punna.
Gianfranca Orunesu
Leave a comment