A pustis de un’iscrutìniu lentu e istorbadu dae unu sistema galu betzu, eris sero est istadu craru chi sa Presidente noa de sa Regione Sardigna est Alessandra Todde, ghia de sa coalitzione chi poniat in paris Partidu Democràticu e Movimentu chimbe isteddos, prus àteras listas. Sa bìnchida però no est istada de maicantu, un’agigu ebbia partzit sas duas coalitziones: su 0,4%, semus faeddende de prus o mancu duamìgia e chimbighentos votos.
Comente càpitat a s’ispissu in custas garas eletorales sas neghes e sos mèritos non sunt craros. Truzzu, su candidadu de su tzentru dereta, at pèrdidu votos medas in sa tzitade chi at gestidu in custos annos, Casteddu, e at leadu votos de mancu in cunfrontu a sas listas. Custu cheret nàrrare chi su sèberu de Meloni de li dare su logu de Solinas est istadu una faddina? Non si podet ischire, ca finas su Presidente betzu no agradaiat a gente meda. Beru est chi sas cuntierras fintzas a bennàrgiu e sa candidadura cherfida dae Roma, no ant dadu nen tempus e ne agiudu a sa coalitzione de Truzzu. In prus sos chi ant bìnchidu ant balangiadu dae acontèssidas italianas, comente sa manifestatzione reprimida cun violèntzia in Pisa, e dae su prus tempus chi ant àpidu pro chircare preferèntzias.
Sa coalitzione sarda, cussa fraigada fatu a Soru, e cun a intro sos indipendentistas, at fatu bene, ma no est renèssida a suprire a Via Roma. Podet agradare o nono su progetu de Soru, ma una lege chi ponet un’àidu gasi artu chi nemmancu cun prus de su 8% si resesset a colare, no est giusta in una democratzia comente si tocat.
Bisòngiat de nàrrere chi sa bìnchida de Todde at a ispantare sa polìtica italiana e lu semus giai bidende. Est sa prima borta a pustis de su 2015 chi su tzentru manca leat una Regione a sa dereta. Est sa prima borta chi su Movimentu chimbe isteddos ponet unu Presidente de Regione. Sa Presidente Meloni non perdiat un’eletzione dae maicantu e su resurtu a curtzu de sas eletziones europeas li podet fàghere male. Totu cosas chi però pagu pertocant sa Sardigna.
Sa prima Presidente fèmina de sa Sardigna est una persone de gabbale, duas làureas, esperièntzias in fora de Europa e cun cara a sas tecnologias noas. Amus a bìdere si a pustis de duas Giuntas chi pagu de bonu ant fatu, nessi custa borta si potzat sighire una lìnia dèghida in campos de importu mannu, comente sa sanidade, sos trasportos e s’iscola. Fintzas in sa faina de sa limba sarda amus a bìdere ite punna tenet e si at a fàghere mègius de s’assèntzia de Pigliaru o su trìulu de Solinas. S’ispera de sos sardos est chi Todde traballet bene e potzat megiorare sa situatzione sarda chi est grae de a beru.
(redatzione)
Leave a comment