A nadale sos analistas militares americanos aiant decraradu chi s’esèrtzitu israelianu podiat andare a dae in antis duas o tres chidas in Gaza, ma chi posca sos gastos diant èssere istados gasi mannos dae firmare s’invasione. S’analisi, chi fiat un’ispera de gente maicanta, no est divènnida realidade. Antzias, in custas dies paret chi su guvernu israelianu tèngiat sa punna de ismanniare sa gherra e interessare finamentas su Lìbanu, atachende Hezbollah, e mitzidiare s’Iran.
Oramai Netanyahu paret sena làcana peruna e nemmancu sos alleados traditzionales, sos USA e s’Europa, a pustis de l’àere agiudadu, ant sa fortza de li pònnere cale si siat frenu. Fintzas pro sos crìmines de gherra chi sunt essende a campu a fitianu, paret chi s’opinione pùblica mundiale non renessat a si fàghere intèndere. Sas agentzias de imprenta sunt iscumproende acontèssidas graes: persones cun banderas arbas isparadas dae sos tzechinos; bombardamentos contra a tziviles innotzentes; sa comunidade de sa Cisgiordania atacada addidudentu; giornalistas palestinesos, e sas famìllias issoro, chircados e ochidos a sighidura. In prus, su guvernu israelianu at decraradu chi fintzas a cando totu cantos sos presoneris israelianos no ant a torrare a domo, nemmancu sos pròfugos de Gaza ant a pòdere ghirare.
Ma pro ite est capitende custu degògliu? Ponende a banda s’òdiu de sos israelianos (semenadu dae sos guvernos de dereta in sos annos colados e pesados dae Hamas cun sas acontèssidas de su 8 de santugaine); b’at un’àtera resone. Sas riformas, in bidea de cambiare in manera autoritària s’Istadu ebreu, sunt istadas botzadas, sa gestione de sa siguresa at faddidu e como s’andanta de sa gherra est abolotende sa sotziedade e iscontzende raportos internatzionales fungudos. Netanyahu ischit chi cando sa gherra at a agabbare sa carriera polìtica sua at agabbare in su matessi tempus. Allonghiare custu disacatu serbit puru pro agatare una bìnchida de impitare comente arma in sa polìtica de intro.
(redatzione)
Leave a comment