Como como su presidente de sa Repùblica italiana, Sergio Mattarella, at resadu su messàgiu de concruos de annu a retes unificadas. In sos sèighi minutos de parlata, antitzipados dae unu drone chi dae sas àeras de su montigru nch’est intradu a s’aposentu suo, su cabu de istadu at faeddadu unu pagu de totu sos temas in agenda, comintzende dae sa situatzione internatzionale, mescamente de sas duas gherras prus contadas (ca àteras bi nd’at in custu mundu) timende su perìgulu «de nos avesare a custu orrore». Deretu at faeddadu de sa Rùssia e de sos tentativos de annessione de s’Ucraina. Posca nch’est coladu a Palestina, faeddende de s’acontèssida de su 7 de santugaine e de sa reatzione israeliana chi est cajonende «mìgias de vìtimas tziviles». Dae una violèntzia a s’àtera. S’àteru tema in agenda est su de sa de gènere: «S’amore no est egoismu, possessu, domìniu, orgòlliu fraitzu. S’amore reale est prus chi non rispetosu: est intregu, est a s’indonu, est sensibilidade». Posca at faeddadu de àteras chistiones: de traballu e de malos pagadores (ma non de sas esperièntzias virtuosas e conflituales chi gherrant pro lu sarvare, Gkn pro nàrrere), de su tempus prus chi non longu isetende una bìsita in sos ospidales (ma non de sa sanidade semper prus privada), de s’evasione fiscale (ma non de sa progressividade costitutzionale). In ue nch’est fertu s’artìculu 3 de sa Carta cun sa Repùblica chi «rimuove gli ostacoli» de sa disagualidade? Pro ite mancu una crìtica a sos guvernos chi, intreverende·si, no ant aplicadu sa Costitutzione? sa risposta est fàtzile. In prus at faeddadu de sa crisi climàtica (ma non de su sistema de produtzione chi la cajonat) e de sas trumas de gente chi si nche fuint dae su logu issoro (sena tocare mancu pro iscuta su contributu otzidentale). A concruos sas chistiones tecnològicas e de s’intelligèntzia artifitziale. «Devimus fàghere a manera chi sa rivolutzione chi semus vivende abarret umana». Sulenu preside’. S’annestru de s’AI est giai umanu. Ma no est s’òmine in sesi su problema, cantu unas cantas chistione chi non ais mentovadu.
màuru piredda
Leave a comment