Sa Torres non bi l’at fata. Sa punna fiat sa de bìnchere su disafiu de oe pro torrare in prima positzione. Ma su parègiu de oe rapresentat unu puntu prus chi no de importu. Sa partida fiat in trasferta e su Cesena est su Cesena, est a nàrrere una favorida de su campionadu cun una rosa de giogadores chi podet permìtere flessibilidade manna a s’allenadore Toscano. Sa Torres non bi l’at fata ma de custa manera sos aversàrios, però, non si nche sunt fuidos ancora de prus. Sa tzitade de Tàtari est dende grandu proa de sustennu a s’iscuadra; sos tifosos chi dae eris sunt mòvidos dae Sardigna pro sighire sos 11 de mister Greco nde sunt una proa. E sa Torres cheret bene a Tàtari e a totu sos torresinos de Sardigna. In sa partida de oe l’ant ammustradu dende ite bìdere a sos meres de domo pro totu su primu tempus e paregende deretu in su segundu. A su de 48 minutos su Cesena colat in vantàgiu cun Shpendi chi nche la tzacat a intro cun unu tiru mànchinu chi non perdonat a Zaccagno. Tres minutos a pustis su gol de su 1-1 chi impedit a su Cesena de allongare su passu: cross de Scotto conca a su segundu palu, Zecca chi pigat sa botza dende·la a Fishnaller chi non si la faddit. Sa partida finit cun custu resurtadu e sa distàntzia intre sa cabulista e sos nostros est semper de duos puntos: 43-41. Fatu fatu su Pescara cun 10 in mancu. Chenàbura e sàbadu est s’ùrtima de su girone de andada e, duncas, petzi Cesena e Torres podent punnare a su tìtulu de campione de ierru. De cada manera in ghennàrgiu comintzat su girone de torrada e, comente narat mister Greco, «est un’àteru campionadu». Sa Torres cheret chi bi pòngiat su matessi aficu si cheret lòmpere a sa Sèrie B. A su presente de degheoto partidas nd’at bìnchidu 12, una in mancu de su Cesena, paregende·nde 5 e perdende·nde una ebbia. Su bilantzu est bonu e sas isperas mannas.
màuru piredda
Leave a comment