Cada mangianu una poesia. Una letura. Ma finamentas un’iscurtu. Est su chi nos est proponende su giornalista “sardu de Lodè” – comente si presentat isse etotu, gasi arraighinadu a sa comunidade nadia – Luciano Piras. Su situ suo, @addurudduru…L’altra Sardegna, tenet difatis una rubrica dedicada a sas rimas (e no a sas rimas ebbia). “Inversu” est su nùmene chi l’at dadu e custu giru su tema de sos poetas chi bi sunt lassende su marcu, cun testu e boghe, est su de sa paghe. Inversu est, comente narat Piras etotu, «un’ispàtziu riservadu a sa poesia, in cada forma. Onni tres meses apo a propònnere una paràula tema pro chi, movende dae issa, nos cunfrontemus e apamus bona muta. Chie cheret mi podet imbiare una poesia sua, in sardu o cun àteras limbas de Sardigna, o in italianu. Sas poesias lòmpidas las apo a publicare in sa setzione». Fintzas cun sa versione àudio: «est bastante la registrare cun su smartphone», narat. E gasi sunt faghende sos chi l’ant imbiadu e li sunt imbiende su materiale. De prus: a concruos de sos tres meses Piras at a collire totu sas poesias assentende·las in unu pdf postu a disponimentu a s’indonu. Su tema de sa paghe at a èssere, in pràtica, su nùmeru zeru. Dae ghennàrgiu at a comintzare s’iscansione trimestrale. Sos temas imbenientes? A bìdere istemus.
redatzione
Leave a comment