Est de pagas dies sa nova chi lompet dae Amèrica in contu de atacos informàticos a unu tzentru de chirca nucleare. Sos hacker de SiegedSec, chi giai si fiant fatos connòschere intrende·nche a sos servidores de sa Nato, custu giru ant fatu incursione in su Idaho national laboratory (Inl), istrutura gestida dae su dipartimentu de s’Energia de sos Istados unidos e cun 6mìgia ispetzialistas chi bi traballant.
Cun custa atzione sunt resèssidos a ghetare sas brancas a chèntinas de mìgias de datos de utentes, dipendentes e tzitadinos. A su chi si leghet, cunforma a su chi ant naradu dae su laboratòriu matessi, sos hacker nche sunt intrados a sos servidores isfrutados dae su sistema Oracle Hcm chi suportat sas aplicatziones pro sas risorsas umanas.
Sa prassi est nòdida: una borta intrados, sos bardaneris informàticos ant publicadu parte de sos datos furados (nùmeros de previdèntzia sotziale, refertos sanitàrios, contos bancàrios e meda àteru galu) cumpartzende·los in forum apòsitos e in su canale Telegram issoro sena mancu intrare in tratativas cun s’istrutura violada.
S’atzione de sos de SiegedSec, mancari non pertochet datos in mèritu a sa chirca nucleare, at postu in oriolu sas autoridades. S’Inl, difatis, gestit datos prus chi non sensìbiles sende chi traballat a unos cantos programmas de seguridade natzionale Usa che a sos de sa defensa de sas infrastruturas crìticas dae atacos informàticos e fìsicos, de sa gestione de sas armas nucleares e de s’isvilupu de sas tecnologias rinnovàbiles.
Gianfranca Orunesu
Leave a comment