Non nch’at coladu tempus meda dae cando Ubuntu at ritiradu sa versione 23.10 “Mantic Minotaur”. Sa resone? Messàgios de òdiu cuados intro sa distributzione e postos dae unu contribudore malintentzionadu pro mèdiu de un’istrumentu de “tertzas partes”, e duncas estràneu a s’archìviu de Ubuntu.
Sas istringas malefaeddadas las ant agatadas in sa versione in limba ucraina. Un’episòdiu grave meda, e sos utentes faghent bene a si preguntare si, a pustis de sos messàgios de òdiu, finamentas su malware si podet cuare mudende sas distributziones in istrumentos de difusione malèsiga.
Canonical at ripristinadu sa versione curreta de sas tradutziones ucrainas, boghende·nche sos messàgios incriminados, e como Mantic Minotaur est disponìbile pro s’iscarrigamentu.
Sa versione noa podet bantare novidades in unos cantos àmbitos comente, pro nàrrere, sa critografia. Est finamentas possìbile a seberare s’optzione de installatzione mìnima (introduida in su 2018) chi previdit elementos bàsicos comente su navigadore, su terminale, un’editore de testu e un’istrumentu pro installare aplicativos.
Su coro est su Kernel 6.5 cun novidades in contu de driver gràficos e de connetividade.
Comente ambiente desktop b’est Gnome 45, issu puru cun medas novidades comente un’impostatzione lestra pro mudare s’illuminatzione de dae segus de sa tastiera, o su file manager “Nautilus” chi at megioradu in velotzidade e capatzidade de chirca (b’est difatis sa funtzione “chirca in totue”).
Mantic Minotaur lu podimus iscarrigare cun fatzilidade dae su ligàmene https://www.ubuntu-it.org/download (sa comunidade italiana de Ubuntu) o dae https://releases.ubuntu.com/mantic/.
Chie preferit a fàghere deretu s’avantzamentu de sa versione currente, lu podet fàghere aviende s’aplicativu “software e aggiornamenti” in s’ischeda dedicada a sas versione noas.
In prus de sa versione desktop, sunt disponìbiles sas immàgines ARM pro su Raspberry Pi 5.
Gianfranca Orunesu
Leave a comment