Sa garante de sos presoneris Irene Testa nch’est lòmpida pro sa segunda borta a su Cpr de Macumere pro una bìsita ufitziale. Su bilantzu suo est prus chi non crìticu. «Penso chi – narat –, mancari sos isfortzos de gestione dae parte de su diretore e de su coordinadore de s’istrutura pro acollire e tentare sos tratènnidos, medas sunt sas crititzidades cajonadas in particulare dae su regulamentu de sa ministra Lamorgese, prus chi non limitadu in su capituladu de ispesa ma fintzas in sas dispositziones relativas a sa vida in intro de su tzentru. Comintzende dae sos lentzolos mono-impreu frunidos, chi non giuant. Sos tratènnidos no las impreant ca dant eletritzidade istàtica». Àtera chistione pesada dae sa garante est sa de s’impreu de su telefoneddu. «Sos òspites de su Cpr no los podent impreare, ant ebbia unu telèfonu cun s’ischeda. Pro su bonu de custas persones ospitadas, chi sunt pòberas e nudda tenent, lis benit difìtzile meda a cramare a fitianu a su paisu issoro». De prus, semper pro neghe de su regulamentu no lis podent frunire pinnas, lapis, cadreas, ispugnas e iscòbulos. «In intro – sighit sa garante – apo agatadu situatziones ischitzofrènicas, de gente chi mancu istare bi devet in cue. S’aumentu de sa permanèntzia finas a 18 meses pro sos chi non ant commìtidu reatu perunu – e in cunditziones finas peus de sa galera – est cosa chi non si podet atzetare». Sos òspites presentes su die de sa bìsita, oe, fiant 38. Ma luego custu nùmeru at a raddopiare e su personale non est a tretu de bi traballare pro more de sas pagas unidades presentes. Sas dies imbenientes sa garante Irene Testa s’at a indiritzare a su ministru de s’Internu pro cumprèndere comente ant a gestire sos arrivos noos in s’ìsula. «A custa gente – narat Testa – nde lis ant bogadu totu, lassemus nessi chi contivigent sos afetos issoro».
màuru piredda
Leave a comment