Su 29 de santugaine est mortu in s’ispidale de Tàtari Giampiero “Zampa” Marras. Teniat 88 annos. Giai professore in s’iscola superiore e a coa dipendente bancàriu, aiat dedicadu totu sa vida sua a sa càusa de s’indipendentismu e de sa limba sarda.
A sa militàntzia polìtica, in su Partidu Sardu e in Sardigna Natzione, aiat unidu cudda culturale, in su Tàtari de sos annos ‘70 e ‘80, cun s’Iscola Sarda, in ue pro annos faghiant letziones de sardu, e trasmissiones radiofònicas.
Fiat semper abarradu ligadu a sa figura de Antoni Simon Mossa, su babbu de s’indipendentismu sardu modernu. “Fia s’umbra sua”, naraiat.
Istimadu dae totus in su mundu natzionalista, massimamente pro su caràtere geniosu e a bortas befianu, fiat nàschidu in Otieri dae mama oranesa e in sos ùrtimos annos si fiat retiradu in Ìtiri.
(redatzione)
Leave a comment