Mancant prus o mancu bator meses a sas eletziones regionales in Sardigna, cun in mesu Pasca de Nadale e annu nou, ma sas fortzas polìticas chi ant a partetzipare no ant galu decraradu sos candidados presidentes issoro. Su problema no est petzi in s’ìsula nostra, ma pro su prus in Roma.
Su tzentru dereta est in unu disafiu intre Salvini e Meloni: unu cheret andare a dae in antis cun Solinas, ca est sa cara bona de sa Lega de inoghe chi at pèrdidu cunsensu meda in custos annos; s’àtera cheret Truzzu, su sìndigu de Casteddu, chi est su polìticu sardu prus connòschidu de su partidu suo chi est creschende in totue. Paret chi non b’apat una figura chi potzat aunire sos duos interessos, o a su nessi non la sunt nemmancu chirchende, ca est una chistione de pònnere banderas, sinnare su cuntrollu e contare sa fortza in un’arresonu chi non pertocat sos sardos: est una batalla de duos partìdos, intre duas persones. Una genia de echilìbriu, difatis, si diat pòdere agatare cun persones chi ant sustennu e votos in Sardigna, ma custas pro su prus sunt a intro de Forza Italia, unu partidu chi, a pustis de sa morte de Berlusconi, est dèbile meda in su Parlamentu.
Sa dibata chi b’est a intro de su tzentru manca, no est diferente meda, mudant sos personàgios ma sa dialètica s’assimìgiat. Posta a banda sa possibilidade de fàghere sas primàrias, ca diat pòdere essire unu resurtu ispantosu, su sèberu s’at a fàghere intre sos partidos prus mannos. Dae un’ala b’est su Movimento cinque stelle chi cheret candidare Alessandra Todde, sustènnida finamentas dae su PD chi cheret mantènnere bia s’alleàntzia de sas opositziones. Un’acordu chi però est matanosu, ca ambos duos sunt chirchende de si conchistare su rolu de partidu prus de importu contra a sa Meloni. Dae s’àter’ala b’est sa base de sos iscritos e de sos partidos de su “campo largo” chi, sigomente non cherent cumandos dae artu, ant minetzadu de isciusciare su traballu fraigadu fintzas a como. In prus b’est Soru chi cheret torrare a fàghere polìtica e a si candidare, partzende su tzentru manca, ma ischidende unu cunsensu pro sa figura sua chi no est galu istudadu de su totu.
In su campu indipendentista, a pustis de sa noa de s’alleàntzia de ProgReS, IRS e àteras siglas sardas cun sa manca italiana comunista, de nùmenes non nde sunt essidos a campu. Comente no si connoschent propostas, documentos, lìneas o programmas. Su “Secondo Polo”, gasi ant seberadu de si mutire, at fatu una atòbiu su 17 de cabudanni in Aristanis, pro ascurtare sa base, e unu comunicadu a santugaine chi si chèsciaiat pro sa manera de publicatzione de carchi sondàgiu. In unu momentu chi sos partidos italianos sunt a sa muda, dèbiles pro sas insumbatas de sa giustitzia e pro su trìulu issoro, fintzas sos indipendentistas contivìgiant su mudìmene.
Gabriele Tanda
Leave a comment