Dae su 20 a su 27 de santugaine sa tzitade catalana de Lérida at a èssere sa sede de ÒC Cultura-Jo sò er aute. Protagonista de sa sèrie de initziativas, organizadas dae s’Institut de Estudis Ilerdencs, est sa limba otzitana.
S’antiga limba d’oc est una de sas prus in perìgulu in s’Europa otzidentale e custu mancari s’àrea de apartenèntzia siat manna meda, belle totu su sud de Frantza, prus de sas minorias linguìstica de sa Repùblica italiana, pro nàrrere.
Unu cantigheddu de custu territòriu s’agatat pròpiu in Catalogna: sa Badde de Aràn. Pro custa resone finas sa Catalogna tenet militantes linguìsticos, a chie de limba materna otzitana e a chie nono, chi sunt gherrende pro chircare de sarvare custu idioma.
Mùsica, umorismu, giornalismu e mèdios de comunicatzione in generale sunt sas armas impreadas in custa batàllia culturale.
Si cumintzat su 20, a sas sete de sero, in s’Àula Magna de s’Istitutu, cun su cuntzertu de Eric Fraj. At a propònnere su repertòriu suo, in otzitanu, catalanu, ispagnolu e frantzesu, acumpangiadu dae Morgan Astruc.
Su 26, a sas ses de sero, semper in s’Àula Magna, est in programma una tzarra umorìstica cun Ferriol Macip intitulada Désolé, monsieur, non i pogui hèr arren.
Macip, nàschidu in Bartzellona, est giornalista, tradutore e musicante, chi chircat de dare amparu, in totu sas initziativas suas, siat a s’otzitanu che a su catalanu. At a propònnere anèddotos de vida reale, leados dae s’esperièntzia sua personale, dedicados a su tema de sa limba otzitana.
Su 27, dae sas chimbe a sas oto, in sa corte de s’Istitutu, ddo’at àere ispàtziu pro sos autores de duos podcast. Su primu, País invisible, est dedicadu a su mundu otzitanu. Sos animadores sunt Zep Armentano, David Valls e Ferriol Macip etotu. S’àteru, Sons Occitans, a incuru de Anna Geli, proponet, in sa variedade aranesa, unu programmatzione musicale.
(gianni muroni)
Leave a comment