Comente si ligant a pare sas limbas de minoria e sa RAI. Ite est cambiadu in sos àrtinos annos, e ite b’at a sas bistas pro su tempus venidore. Sunt sos argumentos de sa cunferèntzia “Rai e limbas de minoria”, amaniada dae Rai Sardigna in ocasione de su Babel Film Festival, su cuncursu tzinematogràficu internatzionale dedicadu a sa filmografia produida in sas limbas minoritàrias.
Sa cosa est in programma pro su 5 de santugaini in su Teatru Màssimu de Casteddu. In antis bi sunt sas istèrridas de Andria Biancareddu, assessore de sa cultura de sa Regione Autònoma de Sardigna, de Antoneddu Zanda, diretore de sa Tzineteca Sarda e diretore artìsticu de Babel Film Festival, de Lisandru Zucca, diretore de su Coordinamentu sedes regionales RAI e de Elin Jones, presidente de ELEN (European Language Equality Network). Pustis b’at pròpiu sa cunferèntzia, chi est dividida in duas partes: sa prima, de caràtere istitutzionale, tratat de s’impinnu de sa Rai pro sas minorias linguìsticas de sa Repùblica; sa de duas, prus tècnica, tenet su tìtulu “A ue est andende sa limba sarda?”, cun sos interventos, in mesu de sos àteros, de istudiosos de sas universidades de Casteddu, Tàtari e Siena.
A sa cunferèntzia, chi s’at a congruire cun un’anteprima de su documentàriu “3 dies pro cambiare” de Istèvene Fozzi, ant a leare parte Guido Corso, responsàbile de Rai Friuli-Venezia Giulia, Severino Zampaglione, responsàbile de Rai Valle d’Aosta, Paolo Mazzucato, responsabile de sa sede Rai de Bolzano-Bozen e Carmen Botti, responsàbile de Rai Sardigna.
S’eventu si podet sighire in direta streaming in www.rai.it/ufficiostampa, cumintzende a sas 3 de merie.
(sa redatzione)
Leave a comment