Sa Corte de sos Contos, a pustis de àere analizadu su bilantzu de sa Regione Sardigna, at fatu carchi crìtica a sa Giunta Solinas. Si est beru chi sas càscias sunt prenas e b’at prus dinari chi non s’annu coladu, sa Corte sutalìneat chi sa manera de gestione no andat bene: sunt peoradas sas «dificultades de programmatzione e gastu de sas resursas […] chi podiant agatare carchi giustificatzione in su cuntestu de s’apretu sanitàriu de su 2020 e 2021», ma non como. Su documentu faeddat de 2,9 milliardos e b’at de annànghere sos 166,5 milliones chi s’Istadu at dadu a sa Regione pro sa chistione de s’insularidade. Fintzas pro custu dinari b’at carchi problema: sa Giunta no at dadu galu inditu perunu de sos interventos chi cheret fàghere pro sos trasportos, ma est ponende totu in paris cun sos àteros soddos. In prus b’at su trigadiu de s’esertzìtziu provisòriu chi, est una medida desemprada, ma chi oramai paret sa règula. Solinas at acraridu chi sos problemas sunt de «produtzione normativa» e chi sa punna de afortiare su bilantzu at istorbadu sos pianos e sas previsiones.
(redatzione)
Leave a comment