Sa Coldiretti sarda, in paris cun su Ministèriu de su Traballu Chirghisu, at ammanigiadu unu progetu pro batire in su 2024 una chentina de chirghisos, cun sas mugeres issoro, pro sustènnere su setore de su pastoriu in Sardigna. S’idea est bènnida a pustis de cuntatos cun s’Istadu tzentru asiàticu dae imprendidores sardos, chi in ie aiant agatadu su bisòngiu de cumpetèntzias pro produire casu berbeghinu. Sa connoschèntzia at ammustradu comente sas duas culturas podiant èssere acostiadas pro carchi piessignu, mescamente pro su pastoriu e su raportu cun sos caddos.
Luca Saba diretore regionale de Coldiretti at pensadu a su progetu pro cumbatare sa pèrdida de giòvanos e traballadores in su pastoriu sardu, ca sa crisi demogràfica est menguende sos chi cherent sighire su traballu de campagna e s’edade mèdia est creschende tropu. Sos traballadores rumenos, chi aiant populadu sos sartos sardos in sos annos colados, a lenu a lenu, sunt lassende sa Sardigna pro zonas in ue si balangiat de prus e non sunt nemmancu prus suprende a s’ìsula nostra. Sos migrantes chi sunt lompende, a s’imbesse, pro sa Coldiretti, non si podent impitare in custu setore, ca no ant sa traditzione de sas berbeghes.
(redatzione)
Leave a comment