Finas a sos annos Duamìgia Tim fiat un’azienda de primore in su mundu de sas telecomunicatziones. Pùblica finas a 1997, cun su nùmene de SIP, baliat prus o mancu noranta milliardos de èuros, cun chentu binti mìgia traballadores e influentzaiat àteros Paisos de su mundu. Sa SIM de carigare cun su dinari cada mese naschet intro de sos laboratòrios suos: un’idea chi s’est ispartzinada in su mundu intreu. Fiat gasi forte chi aiat proadu a comporare s’Apple de Steve Jobs. E tando coment’est possìbile chi como apat dèpidu maicantu, petzi trinta mìgia dipendentes e est aorada dae su mercadu mundiale, tantu chi su guvernu est proende a la comporare pro la sarvare?
In su 1999 Roberto Colaninno — su babbu de su parlamentare de su PD, Matteo — còmporat TIM cun un’operatzione criticada meda dae s’opinione pùblica de su tempus. D’Alema, chi fiat sa ghia de su guvernu, non faghet nudda nen pro garantire sos traballadores, nen pro amparare su balore chi bi fiat intro. Roberto Colaninno, chi est mortu custu 19 de austu, devènnidu ghia de TIM ponet a pare cussa cun sa Olivetti, chi aiat abertu su dèpidu cun sas bancas pro sa còmpora. In custa manera TIM depet traballare pro chitire una cantidade de dinari de prus o mancu su mesu de su balore de issa etotu. Dae cussu momentu inghitzant sos litzentziamentos, un’istrategia dèbile in su mercadu e sos càmbios lestros de ghia. Difatis Colaninno at lassadu siat Olivetti, siat TIM, balangende comente bona essida pro sa prima deghessete milliones de èuros, pro sa segunda deghe. Sa carriera de Colaninno s’intritzat fintzas cun Berlusconi, in su 2006, ca b’at fintas isse intro de sa còmpora de Alitàlia.
Como su guvernu est chirchende de pònnere intro de sa TIM su Ministeru de s’Economia cun sa Cassa Depositi e Prestiti cun s’agiudu de àteras aziendas de fora. Una torrada a dae segus chi ammustrat a craru sas faddinas mannas de su barigadu, ma fintzas comente sa polìtica e s’economia italiana fiant e sunt presos cun una matessi soga.
(redatzione)
Leave a comment