A pustis de dies intreas de fogos in Baronia, Ogiastra e Sàrrabus Coldiretti proa a contare sos dannos chi at fatu sa colada de su fogu. Pagos fertos, pro fortuna, fintzas si su fogu est lòmpidu a tretos de mare e a carchi domo costringhende chie bi fiat a fuire in cale si siat manera pro s’arriscu. Aziendas ant bistu sas framas intrare in sos capannones, brusiare trastes e totu su traballu fatu. B’at fintzas animales mortos e àrbores de frùtora totu a chinisu. Francu su dannu econòmicu, b’at cussu ambientale: padentes brusiados e feras mortas. Unu disacatu, su matessi chi onni annu pranghimus in Sardigna.
Coldiretti però acrarit deretu chi non bisòngiat annotare a carchi macu cun su luminu in pòddighes, b’at un’istrategia a dae segus. Non narat ite cheret nàrrere, non faghet nùmene perunu, ca proas non nd’at, però ponet sa duda e segat dae deretu su contu chi si la leat cun un’òmine ebbia. B’at unu pensu, una punna chi bisòngiat de custas ruinas. E tando, si chie b’at pèrdidu, b’at pèrdidu tropu; chie b’at balangiadu? E ite?
(redatzione)
Leave a comment