– de Salvatore Serra –
Ubaldo Bussa Lay (nùmene de arte Ubaldo Lay), su Sheridan famadu de sa televisione, fiat fìgiu de Sarvadore, antifascista oranesu chi istaiat in Roma e operaiat cun Ugo La Malfa in su “Partito d’Azione”. Fiat finas frade de unu ladu de Marianna Bussalai, sardista e antifascista oranesa.
Nàschidu in Roma su 14 de abrile de su 1917, at tentu dae giòvanu sa passione de atore. A dolu mannu at cumintzadu a fàghere sos primos ispetàculos cun sos GUF (Gruppi Universitari Fascisti). Pustis s’est marcadu a s’ “Accademia Nazionale d’ Arte Drammatica”, ma at dèpidu lassare totu cando est cumintzada sa gherra: l’ant leadu comente ufitziale de fanteria e nche l’ant mandadu a su fronte de Jugoslàvia.
A pustis de s’armistìtziu de s’8 de cabudanni de su 1943 est lòmpidu a Bari, in ue at dadu sa boghe sua in sas trasmissiones radiofònicas de s’istatzione controllada dae sos alliados.
In su 1946, a pustis chi s’est laureadu in giurisprudèntzia, at debutadu in Roma in sa revista musicale Niente abbasso, solo evviva cun Cimara, Proclemer, Bonucci e Caprioli; pustis est intradu in sa cumpangia Merlini- Svelz.
In s’ìnteri, in su 1945, fiat torradu a sa ràdiu, intrende in sa cumpangia de prosa de Radio Roma : in su giru de 8 annos at leadu parte in 2000 trasmissiones, dae Non ti conosco più de De Debenetti (1947) a Racconti dell’incubo de Poe (1953) colende pro Il ritratto di Dorian Grey de Wilde (1949) e Questo piccolo mondo de Cowrad (1949, regia de Benedetto). Teniat una boghe chi non si podiat cunfùndere cun sas àteras, e at collaboradu finas in sa ràdiu italiana de New York (1950-51).
A pustis de àere taballadu in su tzìnema in partes segundàrias, in pellìculas comente Toto Sceicco de Mario Mattoli (1950) e Un giorno in pretura de Steno (1953), at cumintzadu in televisione cun Dopo cena de Whotsley 1954) ( sa prima cummèdia de sa televisione italiana) in pare a Marisa Mantovani. In prus, in su 1956, at leadu parte in s’iscenegiadu L’alfiere, leadu dae su romanzu de Carlo Alianelllo, e in su 1957 at interpretadu sa parte de Mason in Jane Eyre revisitatzione televisiva de su romanzu de Charlotte Brontë
Ma nois l’ammentamus mescamente pro s’interpretatzione galana de un’investigadore americanu. In su 1959 at cunchistadu su pùblicu cun sas acuntèssidas de su tenente Sheridan in Giallo Club, Invito al Poliziesco, chi nd’ant fatu, finas a su 1961, tres sèries. Fiat un’iscenegiadu giallu chi manteniat atacados a s’ischermu milliones de ispetadores. Bestidu cun un’impermeàbile biancu, Ubaldo Lay perdiat s’identidade reale sua pro nde leare una televisiva: a bortas l’iscambiaiant pro unu politzotu beru, e lu firmaiant in caminu, in sas butegas, in s’aeroportu, pro li pedire cussìgios. De seguru at contadu, in custa resessida, sa simigiàntzia sua cun s’atore americanu Humphrey Bogart.
In su 1963 at traballadu in sa traspositzione televisiva de Delitto e castigo e in su 1965 in David Copperfield. At sighidu a pònnere sas bestes de su tenente Sheridan finas a su 1972, cando, in s’ùrtima puntada de sa minisèrie La donna di picche, l’ant isparadu unu corfu de balla, fatu chi, in sa fintzione iscènica, depiat inditare s’agabbu de una sèrie chi comprendiat, in s’òrdine: La donna di fiori (1965), La donna di quadri (1968), La donna di cuori (1969), La donna di picche (1972). In su 1975, in sa pellìcula còmica de Ingrassia L’esorciccio , Ubaldo Lay at fatu una parodia de issu etotu.
B’at finas una parèntesi de cantante: in su 1969 at publicadu su 45 giros “Un po’ di fantasia”, in ue cantat una cantzone melòdica cun unu testu unu pagu autobiogràficu (de Casacci-Ciambricco-Meccia- Zamboni. Parte B “Posso scrivere i versi più tristi”) pro sa domo discogràfica CGD.
A pustis de sas resessidas mannas in televisione, est torradu, cando non cando, a sa ràdiu, in Alessandro Magno (1973) e La luna nel pozzo, de e cun Michele Mirabella (1979). Est torradu a essire in vìdeu, a pustis de 12 annos de assèntzia, in sa parte de unu tenente oramai in pensione in sa minisèrie Indagine sui sentimenti (1984); est istada s’ùrtima cumparta televisiva sua.
Est istadu ativu finas in su dopiàgiu, mescamente in sas cumpangias ODI e ARS.
In su 1944 si fiat cojuadu cun Olga Bogaro, nàschida in Mesagne in provìntzia de Brindisi, tzitade salentina in ue s’atore at vìvidu meda. Si nch’est mortu in Roma su 27 de cabudanni de su 1984, pro curpa de un’emorragia tzerebrale. Est interradu in su campusantu de Mesagne.
Leave a comment