In su 2010 essiat Terroni, insaju a caràtere istòricu e sotziale de Pino Aprile subra sa cunditzione de isfrutamentu chi su Nord Itàlia, massimamente su Piemonte sabàudu, at esertzitadu contra a s’Itàlia meridionale.
Aprile, chi at traballadu in sa Rai e est istadu vitzediretore de su setimanale Oggi e diretore de Gente, at chertu ofèrrere una visione diferente dae sa vulgata risorgimentale e sos mitos suos, che a su de sos Milli de Garibaldi. S’operatzione at tentu fortuna faghende de su libru unu fenòmenu de bèndidas.
Ocannu est essidu Il nuovo Terroni, presentadu comente s’editzione definitiva de s’èsitu de su 2010. In custu volume s’autore ammustrat sos nùmeros de su massacru fatu contra a sos meridionales durante sos annos de s’unidade e, àtera novidade, dèdicat unu capìtulu intreu a sa Sardigna: Sardegna, la prima colonia dei Savoia.
Su giornalista e iscritore esponet sa tesi chi s’Ìsula at rapresentadu pro s’amministratzione sabàuda su modellu chi a coa ant perfetzionadu cun s’ex Regnu de sas Duas Sitzìlias. Modellu in negativu, bidu ca dae printzìpiu ant praticadu un’isfrutamentu de sas richesas locales, cumintzende dae sa linna e sighende cun sas minieras.
Non mancant riferimentos istòricos, dae Angioy a s’editu de sas cungiaduras, dae sa fusione perfeta a sa “cassa manna” de su 1899.
Sa “chistione sarda” est istada duncas, narat s’autore tarantinu, su protòtipu de sa “chistione meridionale”.
Aprile est de sa matessi idea de Gramsci, chi cunsideraiat sa Sardigna parte de su Meridione de Itàlia, pro sas cunditziones econòmicas e sotziales.
Su èssere una colònia abbandonada dae su podere tzentrale at cajonadu, sighit Aprile, una situatzione de suta-isvilupu, bidu ca galu in su 1950 215 biddas sardas fiant sena de bassa, 60 sena de abba in sas domos e 40 sena de lughe elètrica.
(gianni muroni)
Leave a comment