de Salvatore Serra
Amedeo Nazzari, nùmene de arte de Amedeo Carlo Leone Buffa (Casteddu, 10 de nadale de su 1907 – Roma, 5 de santandria de su 1979) est istadu un’atore sardu. Est una figura de ammentare pro sa seriedade e s’impinnu in su traballu; òmine de bella presèntzia, no at tentu una vida assolocada comente àteros collegas suos, ma at pensadu sceti a pònnere unu infatu de s’àteru una sèrie de traballos chi ant tentu unu resurtadu bonu.
Fìgiu de Sarvadore Buffa, mere de una fàbrica de pastas, e de Argenide Nazzari, aiat leadu su nùmene de arte dae su giaju Amedeo Nazzari, chi fiat istadu presidente de sa Corte de Apellu de Vicenza e pustis si nche fiat tramudadu a Casteddu.
Amedeo Buffa teniat ses annos ebbia cando su babbu si nch’est mortu e sa mama si nch’est tramudada cun issu e cun sas sorres a Roma. Inoghe at istudiadu in unu collègiu de salesianos, in ue at acumpridu sa vocatzione artìstica sua, cumintzende cun sas rètzitas in iscola, sighende in sos palcos de sas filodrammàticas e lompende, a pustis de àere lassadu sos istùdios de ingenieria, a su teatru.
Su cumintzu comente professionista b’est istadu in su 1927, cun sa cumpangia de Dillo Lombardi; pustis est coladu a cumpangias prus de importu comente sas de Annibale Ninchi, Memo Benassi e Marta Abba.
In su 1935 l’at notadu Elsa Merlini chi l’at propostu una parte in sa pellìcula Ginevra degli Almieri, ma su film no at tentu una resessida bona e Nazzari est torradu a su teatru.
Est istada torra un’atora, Anna Magnani, a intzertare sas calidades suas: artista giòvana chi fiat essende a pìgiu pròpiu tando, e pobidda de su regista Goffredo Alessandrini, issa at insìstidu cun su maridu pro chi Amedeo aeret fatu parte de su grupu de atores de Cavalleria. Sa prestàntzia fìsica sua, irrichida dae s’incantu de sa divisa, at a èssere s’atratzione prus importante de sa pellìcula chi, presentada in Venezia in sa Mustra de su Tzìnema, e pustis projetada in totu sas salas de Itàlia, at a èssere una de sas chi ant incassadu de prus in su 1936.
Un’àtera pellìcula in divisa at a èssere in su 1938 sa segunda resessida bona cun su pùblicu: Luciano Serra pilota, semper cun sa regia de Alessandrini.
Oramai Nazzari fiat una cara connota, e fiant medas sas ofertas de traballu; ma sas brias suas cun sos produtores pro intervènnere in sos diàlogos de sas pellìculas chi intèrpretaiat e pro cussigiare càmbios de iscenegiadura non prevìdidos in sos copiones, l’aiant dadu sa fama de pessone reberde.
In su 1941, in sa IX Mustra internatzionale de arte tzinematogràfica de Venezia, su conte Giuseppe Volpi de Misurata l’at intregadu sa Cupa de su Ministèriu de sa Cultura Populare comente mègius atore pro sa pellìcula Caravaggio, il pittore maledetto, semper diretu dae Alessandrini; s’annu a pustis, La cena delle beffe l’at cunsacradu in manera definitiva comente “divu” de su tzìnema. Sa pellìcula, direta dae Alessandro Blasetti, est unu dramma in costùmene chi si isvilupat in sa Firenze de sa famìlia Medici. Leadu dae su poema omònimu de Sem Benelli, tenet a beru una resessida manna de pùblicu, e abbarrat in sa memòria istòrica de sos ispetadores italianos pro una sèrie de resones: in antis de totu ca b’est sa prima iscena de nudu feminile (un’incuadradura de pagos segundos de Clara Calamai cun su sinu iscugugiadu, chi at a costare sa proibitzione a sos minores e sa cundenna de sas autoridades eclesiàsticas); un’àtera resone est chi in su grupu de atores b’at duos amantes giòvanos, Osvaldo Valenti e Luisa Ferida, chi dae cue a pagos annos ant a tènnere unu destinu tràgicu ca sos partigianos los ant a acusare de collaboratzionismu e los ant a giustitziare; in fines b’est s’interpretatzione forte (e oe diamus nàrrere finas unu pagu gigionesca) de Nazzari, chi in custa pellìcula rètzitat sa batuta sua prus famada: «…e chi non beve con me, péste lo cólga!». Repìtida dae totus esagerende s’atzentu sardu de su protagonista, at a devènnere cun su tempus una frase a sa moda.
A pustis de unas cantas pellìculas minores fatas in su tempus de sa gherra, e peleende meda, sunt torradas sas partes de importu: Un giorno nella vita de Blasetti, in ue at interpretadu unu cumandante de sos partigianos; Il bandito, diretu dae Alberto Lattuada cun Anna Magnani comente coprotagonista; La figlia del capitano leadu dae su romanzu omònimu de Puskin e diretu dae Mario Camerini, in ue at traballadu cun Irasema Dilian.
Lu cheriant meda finas in foras de Itàlia. In antis est tzucadu a Ispagna, in ue at giradu tres pellìculas. Pustis est andadu a Argentina, in ue però l’ant propostu sa parte de un’italianu disonestu e issu l’at refudada.
Recuidu a Itàlia in su 1949, at retzitadu in pare cun Vittorio Gassman, Silvana Mangano e Jacques Sernas in Il lupo della Sila. S’annu infatu, semper cun Silvana Mangano, at interpretadu sa pellìcula Il brigante Musolino.
In su 1949 at retzitadu, cun s’atora de orìgine grega Yvonne Sanson, in su dramma populare Catene: custu traballu est andadu bene meda, e at inauguradu una sèrie de pellìculas “tira làgrimas” chi ant apassionadu su pùblicu italianu pro totu sa prima medade de sos annos 50, torrende a vida unu gènere, su melodramma populare, giai meda apretziadu in Itàlia in sos tempos de su tzìnema mudu, e chi in sos annos 70 l’at torradu a dare balore finas sa crìtica tzinematogràfica. De custa sèrie b’at de ammentare Tormento (1950), I figli di nessuno (1951), Chi è senza peccato… (1952), Torna! (1953), L’angelo bianco (1955), Malinconico autunno (1958).
Non mancant sas partes “impinnadas”: pro nàrrere, in Processo alla città (1952) at interpretadu sa figura de unu magistradu napulitanu animosu chi parat fronte a sa camorra a primos de su 900. In Proibito (1955) at tentu pro sa prima borta s’oportunidade de interpretare unu pessonàgiu sardu in unu contu de disamistades familiares. In su 1957 l’at seberadu Federico Fellini pro retzitare, in Le notti di Cabiria , sa parte de unu divu in decadèntzia, in ue istrocat, in manera irònica, sa pessone sua etotu.
Semper in su 1957 Nazzari s’est cojuadu cun Irene Genna, atora ìtalu-grega, e un’annu a pustis est nàschida Maria Evelina, chi oe est finas issa atora de teatru.
In sos annos 60 at cumintzadu a tènnere carchi delusione: sa parte de su prìntzipe Salina in su Gattopardo de Visconti, chi in antis l’ant proposta a issu, est andada a Burt Lancaster pro otènnere finantziamentos dae una domo de produtzione americana; in sa versione noa de La figlia del capitano, girada dae Lattuada cun su tìtulu La tempesta, su personàgiu de Pugacev chi depiat èssere su suo l’ant assinnadu a Van Heflin.
Dae Hollywood fiat bènnida sa proposta de girare una pellìcula cun Marilyn Monroe, ma custa borta est issu chi at naradu chi nono, ca li beniat male a retzitare in inglesu, e ca timiat de si rèndere ridìculu in sas iscenas de cantu e de ballu (est sa pellìcula Facciamo l’amore , in ue at a retzitare Yves Montand).
In s’ìnteri, s’est aberta s’istajone de oro de sa cummèdia a s’italiana; ma, a parte carchi etzetzione isporàdica, Nazzari s’est negadu de interpretare custa casta de copiones, pro una chistione, comente at a nàrrere, de sensibilidade e de respetu pro issu etotu e pro su pùblicu. Tando, in s’ìnteri chi atores prus giòvanos fiant prenos de ofertas de traballu, Nazzari est essidu semper prus pagu in s’ischermu mannu, francu carchi parte in produtziones internatzionales, comente Il papavero è anche un fiore, Il clan dei Siciliani e Joe Valachi… I segreti di Cosa Nostra.
Carchi cuntentu l’est bènnidu, in càmbiu, dae sa televisione, in ue est istadu protagonista de sas versiones noas de duas de sas pellìculas suas prus connotas: La cena delle beffe e La figlia del capitano , e est essidu comente òspite de onore in trasmissiones famadas comente Il Musichiere, Studio Uno e Settevoci.
In su 1963 at fatu finas a cundutore televisivu, leende parte in su variedade de su sàbadu sero “Gran Premio” abbinadu a sa “Lotteria di capodanno” e at giradu “carosellos” pro un’aperitivu, repitende comente islogan sa batuta sua prus connota: «… e chi non beve con me …».
In su 1969 sa RAI l’at dedicadu 8 seradas pro trasmìtere una retrospetiva de sas pellìculas suas prus famadas. Su tziclu, chi est andadu bene meda comente ascurtu e comente gradimentu, fiat cuidadu dae Gian Luigi Rondi.
In su matessi annu s’atore s’est impinnadu in sa minisèrie televisiva La donna di cuori, direta dae Leonardo Cortese, paris cun Ubaldo Lay e Sandra Mondaini.
Dae sos annos 70, pro resones de salude, est essidu semper prus pagu in su tzìnema e in televisione. In su 1975 at leadu parte in un’episòdiu de sa sèrie televisiva L’ispettore Derrick, intituladu L’uomo di Portofino e trasmìtidu dae sa RAI in su 1979. In sas ùrtimas duas pellìculas, Nina de Vincente Minnelli, e Melodrammore de Maurizio Costanzo, est essidu in partetzipatziones minores.
Si nch’est mortu in sa clìnica Villa Claudia de Roma su sero de su 5 de santandria de su 1979. Cun su nùmene de Amedeo Nazzari Buffa, est interradu in su campusantu monumentale de su Verano de Roma.
Leave a comment