Ant presentadu in Tàtari, in s’Àula Pissarello de su Dipartimentu Dumas de s’Universidade, su progetu “Free.Da-Liberə dalla violenza”, orientadu a s’assistèntzia e a s’agiudu a sas vìtimas de sa violèntzia de gènere.
Sa cosa l’ant ammaniada s’Òrdine de sos Giornalistas de sa Sardigna e sa Cooperativa sotziale “Porta Aperta”. In mesu de sos àteros, sunt intervènnidos Antonio Solinas, dirigente de sa Comuna de Tàtari, e Rita Zaru, assessora de s’Unione de sas Comunas de su Màrghine, sos cales ant faeddadu de su cuntributu de sos entes issoro in sos interventos sotziales de preventzione e contrastu a su fenòmenu. Ma in s’addòviu ant tratadu finas s’argumentu de su Còdighe deontològicu de sos giornalisas, ponende in craru chi s’art 5 bis inditat sas normas cumportamentales in sa redatzione de sos artìculos, e afirmat s’òbligu de unu limbàgiu respetosu, curretu e cussente de impitare cando si faeddat de feminitzìdiu, violèntzia, molèstias, discriminatzione e fatos de crònaca ligados a s’orientamentu e a s’identidade sessuale, cun sa punna de bìnchere totu sos istereòtipos.
Medas e calificados sunt istados sos interventos, chi ant mustradu una situatzione sarda bastante bona, pro su chi pertocat siat s’assistèntzia a sas vìtimas, siat su respetu de sa deontologia giornalìstica.
Si tratat de seguru de unu discursu abertu, chi at a sighire cun àteros addòvios e presentadas.
(sa redatzione)
Leave a comment