Bild (fintzas connotu comente Bild-Zeitung in Germània) est unu giornale tabloid tedescu nàschidu su 1952 gràtzias Axel Springer, giornalista e giai fundadore de su grupu editoriale cun su sambenadu suo. Est unu giornale chi bendet prus de 5 milliones de còpias. Sas pàginas suas sunt gasi ispainadas in foras de sa pàtria chi su giornale tenet sa tipografia in localidades turìsticas istràngias. Su giornale tenet una lìnia sensatzionalìstica dende prioridade a su gossip e a sa cronaca rosa cun tìtulos a maduru e unu fiotu de fotografia, cun noas curtzas e simpres semper bàntziga-bàntziga intre su sèriu e sa brulla. Como però b’at carchi noa chi pertocat s’organizatzione sua e chi gosi brullera non diat pàrrere. sa diretzione sua at annuntziadu, pro mèdiu de una mail indiritzada a sos dipendentes suos, chi unu cras parte de su traballu redatzionale at a èssere acumpridu pro mèdiu de aplicativos chi movent dae s’intelligèntzia artifitziale. Sa mail pertocat unos canto incàrrigos acumpridos a su presente dae traballadores cun carena e sentidu enarat chi «no ant a èssere comente los connoschimus oe». Sa cosa curiosa est chi non b’at àpidu annùntziu de litzentziamentos. Però est beru finamentas chi su mese de martzu sa diretzione aiat presentadu unu pianu cun 100 milliones de profetos pro sos tres annos a pustis, cun sa tancada de 6 de 18 redatziones locales e cun 200 traballadores in mancu. Sa multinatzionale tedesca chi controllat su Bild tenet punna de s’impònnere su mercadu nordamericanu: pagu tempus a comporeit duos sitos de noas, Politico e Insider. Ma, abarrende in Germània, su grupu Springer est fintzas propietàriu de su Welt, àteru giornale tedescu de importu. Fintzas in cue ant a pigare provedimentos de mèngua de gastos movende dae s’impreu de s’Ia? A bìdere istemus.
mauro.piredda
Leave a comment