Custa chida Putin at decraradu duas medidas chi parent àere sa punna de sinnare sa diferèntzia dae sa cultura Otzidentale e dae su caminu chi Europa e USA ant inghitzadu dae meda: s’amparu de s’ambiente e de sos deretos de sas minorias. Difatis a s’inghitzu de custa chida sa Duma, a pustis de s’inditu de su Presidente de sa Federatzione russa, at proibidu su càmbiu de sessu e at fundadu un’istitu chi istùdiet s’omossessualidade ca, in ie, est una maladia gasi grae chi non si podet nemmancu mentovare in sos mèdia. S’ischit chi sa batalla de Putin contra a sos deretos de sa comunidade LGBTQI+ est un’ossessione, unu pensu chi est su matessi de sa crèsia ortodossa russa, chi imbitzaiat sos giòvanos a firmare in cale si siat manera sas manifestatziones de su Pride. Como, però, su chi sa ghia de sa Paisu fiat fatende prus o mancu a sa cua, lu cheret fàghere a craru e, minetzat, fintzas a manera prus violenta.
Semper custa chida su guvernu russu at postu fora de sa lege su WWF. Sa medida benit a pustis de sa proibida de Greenpeace e àteros assòtzios de custa genia. S’atacu a s’ambientalismu est istadu giustificadu narende chi su movimentu est una manera de s’Otzidente pro arressare s’isvilupu de s’Istadu e chi fiant organitzatziones prenas de persones chi iscobiaiant sos segretos a sos americanos. B’at de nàrrere chi pròpiu Putin in su 2014 aiat bantadu su WWF pro sas campagnas chi aiant sarvadu su leopardu de su Càucasu e su bisonte europeu.
Gabriele Tanda
Leave a comment