Su 17 de làmpadas coladu su sotzialista Jaume Collboni at tentu s’investidura a sìndigu de Bartzellona. Dd’ant votadu su partidu suo de apartenèntzia, est a nàrrere su PSOE, Barcelona en Comù e su Partidu Populare.
Est istada un’eletzione bastante a sorpresa giai chi pariat aviadu a èssere primu tzitadinu de sa capitale catalana Xavier Trias, de Junts per Catalunya. S’acordu cun s’àteru partidu indipendentista, Esquerra Republicana de Catalunya, però, no est bastadu ca ddo’at àpidu un’alleantza intre sos sotzialistas e sa formatzione de manca de s’ex sìndigu Ada Colau, cun in prus s’agiudu fundamentale de sos populares in funtzione anti-indipendentista.
Ambos duos sos printzipales candidados teniant giai esperièntzia polìtica. Trias est istadu sìndigu dae su 2011 a su 2015 in sas filas de Convergència i Unió, mentras Collboni est cussigeri comunale dae su 2015.
Jaume Collboni, avocadu, est nàschidu in Bartzellona in su 1969. Cun issu su Partidu Sotzialista torrat a amministrare in deretura sa tzitade a pustis de una parèntesi de 12 annos. S’ùrtimu sìndigu de su PSOE difatis fiat istadu Jordi Hereu, chi aiat serradu sa prima tapa de sa torrada a sa democratzia caraterizada pròpiu dae su predomìniu tzitadinu de su PSOE.
S’èsitu de sa manovra polìtica chi at giùghidu a Collboni a sètzere in sa cadrea de primu tzitadinu est una cunfirma de sas dificultades chi sunt tenende in custos ùrtimos tempos sas formatziones indipendentistas catalanas.
Sas eletziones polìticas de su 23 de trìulas, cunvocadas in bia antitzipada dae su primu ministru Pedro Sánchez, ant a crarire cale est sa situatzione de su panorama polìticu ispagnolu, chi est bidende un’avantzamentu de su tzentru e de sa destra, cun su Partidu Populare e cun Vox, finas in àreas de traditzione istòrica sotzialista, che a s’Andalusia.
(gianni muroni)
Leave a comment