Sas istrategias pro guvernare sas tecnologias 4.0 ant a èssere sa chistione tzentrale de s’addòbiu “Opportunità e rischi del digitale” prevìdidu pro su 22 de làmpadas in Tàtari. Su tema est prus chi no atuale sende chi custas novidades meressent un’analizu e un’impreu dèghidos e sende chi a su presenta b’at galu meda de nàrrere e de definire pro chi sos arriscos non nche colent su restu.
S’eventu est organizadu dae su I-LAB de sa Càmera de cummèrtziu turritana a pustis de un’annu de atividade. S’initziativa est ocasione pro istèrrere unu bilantzu pro su chi pertocat sas oportunidades digitales pro sas atividades produtivas ma finamentas pro tratare sos arriscos collegados. Su die, unos cantos espertos ant a faeddare de tecnologias noas.
Obietivu comune de sos interventos at a èssere su de promòvere sa cultura e sa cussèntzia digitale e informàtica intre imprendidores, manager, giòvanos e professionistas.
A conduire s’addòbiu b’at a èssere Maria Cristina Origlia, giornalista sòtziu-econòmica; Giorgio Sbaraglia – membru de su comitadu diretivu de su Clusit (Associazione Italiana per la Sicurezza Informatica) – at a inaugurare su cumintzu de sos traballos. In prus ant a intervènnere Andrea Granelli (supervisore tècnicu – iscientìficu de su I-Lab), Paolo Reale (presidente Onif – Osservatorio nazionale informatica forense), Martina Castiglioni (responsàbile formatzione e advisory de su Competence center cyber 4.0), Vittorio Di Tomaso (amministradore delegadu de Maize a Jakala Company), Selene Giupponi (segretària generale Women4Cyber Italia), Alessio Misuri (pm Innovazione e digitale Dintec- Consorzio per l’innovazione tecnologica).
Apuntamentu a sas 9 in sa sala cunferèntzias de sa Càmera de Cummèrtziu de Tàtari (pro partetzipare, su consìgiu est a si nche marcare in su situ www.ilab.ss.camcom.it).
Gianfranca Orunesu
Leave a comment