A pustis de agiumai un’annu de vacàntzia, su parlamentu catalanu tenet unu presidente nou. Est Anna Erra, de Junts per Catalunya, elègida cun cun sos votos de su partidu suo e de Esquerra Republicana de Catalunya su 9 de làmpadas.
Chimbantasete annos, tres fìgios, Erra est istada sìndigu de Vic. Est laureada in Istòria e at traballadu comente professora in s’iscola.
Su ruolu fiat vacante dae prus de un annu a pustis de sos problemas giuditziàrios de Laura Borràs.
Professora de Literatura in s’Universidade de Bartzellona e ex diretora de la Institució de les Letres Catalanes, Borràs dae s’istade de su 2022 non podiat prus esertzitare s’incàrrigu pròpiu pro unu protzedimentu giuditziàriu in atu, chi pertocaiat delitos cummìtidos durante su perìodu passadu in s’istitutzione culturale.
In su mese de martzu de ocannu est arribada sa cundenna pro frode documentale e prevaricatzione amministrativa. In ptràtica Borràs est acusada de àere favoridu sas Letres Catalanes, chi fiat diretora. Duncas custu mese de làmpadas de su 2023, sa primu die, dd’ant bogada dae deputada de su parlamentu autonòmicu puru.
Erra in sas primas essidas pùblica at chertu mantènnere sos ligàmene cun s’ex presidente de sa Generalitat, Carles Puigdemont, su lider indipendentista chi s’agatat galu in Bèlgiu a pustis de àere lassadu s’Ispagna pro iscansare un’òrdine de arrestu cun s’acusa de rebellia e malversatzione in relatzione a su referendum indipendentista de santugaine 2017, non reconnotu dae s’istadu Ispagnolu.
In sa ùrtimas eletziones amministrativas, de maju 2023, sos partidos indipendentistas catalanos ant registradu una pèrdida sensìbile de votos in cunfrontu a su 2019.
Su primu partidu est su Partidu Sotzialista, cun unu 23% de votos, mentras ERC est passada dae su 23% a su 17%. In segunda positzione, cun unu 18%, est Centrem, sigla noa, nàschida cun s’obietivu de unire s’àrea autonomista/natzionalista de tzentrudestra de su chi fiat in antis Convergència i Unió.
(gianni muroni)
Leave a comment