de Salvatore Serra
Una “cadena de blocos”, chi in inglesu li narant “blockchain”, est un’eticheta chi, pro mèdiu de un’istrutura de datos chi s’informatzione sua s’agrupat in cumpostos (blocos) a sos cales s’annanghent metainformatziones relativas a un’àteru blocu de sa cadena anteriore in una lìnia temporale, creat una secuèntzia segura pro mèdiu de càrculos criptogràficos. In custa manera s’informatzione cuntènnida in unu blocu petzi si podet refudare o editare modifichende totu sos blocos anteriores. Custa propiedade cunsentit s’aplicatzione sua in un’ambiente distribuidu, a manera chi s’istrutura de datos “blockchain” podet fàghere a base de datos pùblica non relatzionale in ue b’at un’istòricu de informatzione irrefudàbile.
Sas cadenas de blocos ant cunsentidu, gràtzias a sa criptografia asimètrica e a sas funtziones de resumu o “hash”, s’implementamentu de unu registru contàbile (ledger) distribuidu, su cale cunsentit de suportare e garantire sa seguresa de su dinare digitale. Sighende unu protocollu apropiadu pro totu sas operatziones chi si faghent in sa “blockchain”, est possìbile a otènnere unu cunsensu subra de s’integridade de sos datos suos dae bandas de totu sos partitzipantes de sa retza sena bisòngiu de impitare una entidade de cunfiàntzia chi tzentralizet s’ informatzione. Pro custu est cunsiderada una tecnologia in ue sa “veridade” (istadu afidàbile de su sistema) est fraigada, lograda e afortida dae sos membros suos etotu; e custu funtzionat finas cando b’at, in sa retza, una minoria de nodos cun cumportamentu malinnu (nodos sybil) ca, in teoria, pro cumprumitere sos datos, un’atacante diat tènnere bisòngiu de una potèntzia de càrculu e presèntzia prus manna de totu sos àteros nodos cumbinados. Pro sas resones chi amus naradu, sa tecnologia “blockchain” andat bene mescamente pro iscenàrios in ue si rechedat de immagasinare in manera semper prus manna datos ordinados in su tempus, sena possibilidade de modìfica e revisione, e chi sa cunfiàntzia sua est distribuida, in càmbiu de resìdere in un’entidade tzertificadora.
Custos sunt sos impreos de sa cadena de blocos:
- In su campu de sas criptomonedas sa cadena de blocos si impitat comente notàriu pùblicu non modificàbile de totu su sistema de sas transatziones, pro istransire su problema chi una moneda si podat gastare duas bias. Pro nàrrere, l’impitant cun Bitcoin, Cardano, Ethereum, Dodecoin e Litecoin.
- In su campu de sas bases de datos de su registru de sos nùmenes, sa cadena de blocos si impitat pro tènnere unu sistema notarile de registratzione de sos nùmenes, a manera chi unu nùmene petzi si podat impitare pro identificare s’ogetu chi lu registrat efetivamente. Est una alternativa a su sistema traditzionale de DNS. Pro nàrrere, si impreat in Namecoin.
- Impreu notarile distribuidu in castas diferentes de transatziones pro las fàghere prus seguras, baratas e arrastràbiles. Pro nàrrere, si impitat in sos sistemas de pagamentu, in sas transatziones bancàrias (faghende prus difìtzile su sabunòngiu de su dinare), in s’ imbiu de remissas, in sos imprèstidos e in sos sistemas de gestione de sas resursas digitales.
- Si impitat comente base de prataformas detzentralizadas chi cunsentant de suportare sa creatzione de acordos de cuntratu intelligente. Sa finalidade de custas prataformas est a permìtere a una retza de usuàrios de amministrare sos cuntratos intelligentes issoro. In antis si iscriet unu cuntratu cun unu còdighe e si càrrigat in sa cadena de blocos cun una transatzione. Cando est in sa cadena de blocos su cuntratu tenet un’indiritzu dae ue si podet interagire cun issu. Esempros de custa casta de prataformas sunt Cardano, Ethereum e Ripple.
- Si impitat in sa cuntratatzione pùblica, pro agiuare sa trasparèntzia de sos apaltos: implementamentu de sa cumponente criptogràfica “Bulletin Boards”, impreadu, in mesu de àteru, in sos sistemas de votu eletrònicu (comente at fatu, pro nàrrere, s’impresa energètica ispagnola Iberdola in s‘ùrtima Assemblea Generale de sos Atzionistas); creatzione de registros, astas e foros de discussione.
- S’impitat pro s’arvìchiviatzione cloud, permitende, pro nàrrere, sa creatzione de nodos geográficos diferentes chi sunt bonos a aguantare sa ruta de cale si siat servidore.
- Si impitat pro aprontare unu sistema ùnicu, seguru e immutàbile chi agiuet a pònnere unu remèdiu a sa sustitutzione de sas identidades digitales.
Leave a comment