Manchester City. Ederson, Manuel Akanji, Rúben Dias, Nathan Aké, John Stones (82’ Kyle Walkee), Rodri, Bernardo Silva, Kevin De Bruyne (35’ Phil Foden), Ilkay Gündogan, Jack Grealish, Herling Haaland (all. Pepe Guardiola)
Internazionale. André Onana, Matteo Darmian (84’ Danilo D’Ambrosio), Francesco Acerbi, Alessandro Bastoni (76’ Raoul Bellanova), Denzel Dumfries (76’ Robin Gosens), Nicolò Barella, Marcelo Brozovic, Hakan Çalhanoglu (84’ Kenrikh Mkhitaryan), Federico Dimarco, Edin Dzeko (55’ Romelu Lukaku), Lautaro Martínez (all. Simone Inzaghi)
Chentuchimbanta milliones de ispetadores peri su mundu pro mèdiu de televisiones de 200 paisos; 300 sos milliones de utentes chi l’ant sighida pro mèdiu de sos canales Uefa; 25mìgia sos interistas in s’Ataturk de Instanbul (isàdiu chi nde cabet belle 76mìgia. Custos unos cantos nùmeros de sa finale de Champions league binchida dae sos mancunianos.
Sos citizens, a pustis de sa Premier league (sa de tres s’una in fatu a s’àtera) e da sa Copa de Inghilterra ant duncas fatu “triplete”cunfirmende sa calidade de su fùbalu albiònicu (est de pagas dies sa vitòria de su West Ham United contra a sa Fiorentina in sa Conference league).
Disafiu cun pagos atzuddos, ocasiones lassadas a metade, pagos tiros a porta e ritmu intermitente pro totu su primu tempus. Mùsica simigiante a comintzos de su segundu tempus e fintzas pagu traballu pro s’àrbitru Marciniak chi a su 60’ bogat su primu grogu contra a Barella pro su fallu tàticu. Est in cue chi sa partida mudat in s’iscenàriu tècnicu suo: unu minutu in antis sa proa de Lautaro chi, però, imbetzes de bi la serbire a Lukaku, iscudet una botza chi Ederson ponet in amparu. S’Inter fràigat giogu ma a su 68’ acò sa rete de sos coloricheli: Rodri lompet a una botza bàntziga-bàntziga in intro de un’atzione prus chi non lestra, tiru dae tesu e rete. Mancu su tempus de si sapire de su vantàgiu chi s’Inter, duos minutos a pustis, bi proat ma sena cagiare: dopia s’ocasione, cun Dimarco chi in antis tzentrat su palu traessu e a pustis nche l’iscudet subra a Lukaku. Ma sos nieddu-biaitos non sunt issos ebbia a non nche la pònnere in rete: a su 78 minutos est Foden chi proat a raddopiare ma Onana dat grandu proa de seguresa. Lukaku buscat unu grogu a s’84 e chimbe minutos a pustis proat a paregiare ma Emerson sarvat in sa lìnia. Barella bi proat isse puru a su de 90 ma nudda. Sa copa est inglesa. Sa prima de su City. E como a bìdere istemus si sos Oasis torrant a sonare comente promissu dae Liam Gallagher.
màuru piredda
Leave a comment