A ite servit s’educatzione tzìvica? A formare tzitadinos responsàbiles e ativos, promovende sa partetzipatzione prena e cussente a sa vida tzìvica, culturale e sotziale de sa comunidade.
Ite est s’educatzione linguìstica? Est una pràtica didàtica chi punnat a s’isvilupu de sas abilidades linguìsticas.
Sas duas disciplinas s’addòviant a pare in su testu didàticu in limba sarda “Educatzione tzìvica”, publicadu dae sa Domo editoriale “Condaghes” e ingalanidu dae sas figuras de Eva Rasano, disinnadora casteddaja de gabbale.
Su libru est destinadu a sas classes IV e V de sas Iscolas primàrias de Sardigna e sighit sos inditos ministeriales pro custa matèria. Sos testos sunt iscritos cunforma a sas normas ortograficas de sa Limba Sarda Comuna (LSC). S’òpera est realizada cun su cuntributu de sa Regione Autònoma de Sardigna – Imprentas 2021-22 – LR 22/2018, art. 22.
Narat s’istèrrida de su libru chi sas leges càmbiant in cada Paisu de sa terra, ma b´at balores chi totus podimus cumpartzire, comente su respetu pro nois etotu, pro sos àteros e pro s´ambiente. Pro pòdere defensare custos printzìpios b’at ainas pretziosas:
- sa Costitutzione
- s’agenda 2030
- sas règulas de su caminu
E cale est su mègius logu pro los connòschere e aplicare? Domo nostra… sa Sardigna! Cumintza cun su respetu de sa terra tua e as a èssere a beru unu tzitadinu de su mundu!
Ligàmene: https://www.condaghes.it/scheda/978-88-7356-397-6/educatzione-tzivica/sa
(sa redatzione)
Leave a comment