Su note intre su 2 e su 3 de maju duos drones armados ant atacadu a su Cremlinu, chi est su logu in ue ant sa sea sas istitutziones polìtica de su Paisu. Sa Rùssia at deretu betadu sa neghe a sos ucrainos, ma issos ant decraradu chi no est neghe issoro. Est beru però chi custu est petzi s’ùrtimu sabotàgiu chi at corfadu sa Rùssia. Su fatu est grae meda, ca si pensat chi fiat un’atacu contra a sa vida de Putin e chi isse potzat peorare su livellu de gherra. E tando, chie est istadu? Sighende sas duas dimandas prus de importu: “cale fiat sa punna de s’atacu?” e “comente sunt renèssidos duos drones a lòmpere a subra de su tzentru de su poderiu russu?” si podent fraigare tres ipòtesis.
Sa prima est un’atacu de s’Ucraina. Sas resones non mancant, ca dae meda sa Rùssia est betende bombas a subra de sas domos de sos ucrainos, ochende gente innotzente. Però sa punna non podiat èssere de ochire Putin ca, s’ischit chi su Presidente de sa Federatzione Russa no istat in su Cremlinu a de note. Forsis podet èssere un’atzione pro proare in ue podet lòmpere sa fortza de su Paisu ocupadu, ma fintzas cust’idea paret de pagu tinu: non nde balet sa pena pro una cosa de importu gasi piticu, pònnere in àteru arriscu sos tzitadinos e sos raportos cun sos USA. Ma podet èssere fintzas responsabilidade de servìtzios ucrainos deviados acusados dae sos russos de àere mortu fintzas sa fìgia de Dugin, s’ideòlogu de Putin.
Sa segunda ipòtesi est chi s’atacu l’at fatu sa Rùssia etotu. In inglesu custa genia de atziones di mutint false flag operation, est a nàrrere operatziones cun una bandera fartza, atacos chi parent fatos dae àteros cun sa punna de giustificare atos de gherra prus violentos. Su regime de Putin l’at fatu àteras bortas in su barigadu e custa podet èssere un’àtera. No est s’iscusa pro proare a ochire Zelensky, ca Putin b’at proadu àteras bortas. Forsis est sa manera pro mutire a sa gherra àteros giòvanos russos su 9 de maju, sa festa pro sa bìnchida de sa Gherra Manna Patriòtica. A subra de cust’ipòtesi b’at una duda de importu: su sinnale de fragilidade chi est essidu a campu dae sas immàgines de gherra a intro de Mosca est mannu. Putin diat pòdere chèrrere una cosa gosi?
Sa tertza est chi s’atacu a su Cremlinu l’at fatu unu movimentu de resistèntzia a intro de sa Rùssia. Custu podet giustificare sos sabotàgios acontèssidos in dae in antis, ma Mosca est controllada a finu cun video càmeras e àteros trastes. Fàghere un’atacu gasi no est cosa fàtzile. Sa resone diat pòdere èssere pro fàghere a bìdere chi Putin no est forte comente paret. Ma sas dudas, fintzas inoghe, sunt maicantas.
Gabriele Tanda
Leave a comment