Su 3 de maju est sa Die mundiale de sa Libertade de Imprenta. In su 1991 sa Cunferèntzia Mundiale de s’UNESCO aiat adotadu una Racumandatzione pro garantire sa libertade de sos giornalistas de informare. Su puntu de partèntzia fiat sa decraratzione de Windhoek, in Namìbia, de su matessi annu. Su documentu punnaiat a otènnere un’imprenta africana pluralista e indipendente.
Duos annos a pustis s’Assemblea Natzionale de sas Natziones Unidas at istituidu custa die.
Ogna annu si tzèlebrat in una sede diferente cun unu tema diferente. Ocannu s’UNESCO organizat un’eventu ispetziale in Nova York pro afestare sos 30 annos de s’initziativa.
Cunforma a sos inditos de s’ONU s’obietivu de sa ricurrèntzia est de carculare su livellu de libertade de imprenta in totu su mundu, de difèndere sos mèdios de informatzione dae atacos chi podent minimare s’indipendèntzia issoro e de dare unu tributu a totu cuddos giornalistas chi sunt mortos faghende s’arte issoro, vìtimas de gherras e regimes libertitzidas.
In custos ùrtimos tempos unu de sos problemas chi ant tentu sos operadores de s’informatzione, massimamente sos giornalistas investigativos, est s’aplicativu Pegasus, de fabbricatzione israeliana. Su programma at permìtidu de ispiare sos telèfonos tzellulares de deghinas de mìgias de giornalistas in totu su mundu, copiende e imbiende nùmeros e còdighes de intrada.
Su spyware, produidu dae sa NSO Group Technologies, fundada in s’istadu ebràicu in su 2010, est a dispositzione de diferentes agentzias guvernativas.
Ateruna chistione essida a pìgiu cun fortza in sos ùrtimos annos est sa de sos giornalistas privados de sa libertade. Su casu emblemàticu est su de Julian Assange. Australianu, fundadore de s’organizatzione Wikileaks, chi in su 2010 at publicadu datos sensìbiles de s’intelligence militare de sos Istados Unidos e acusadu de ispionàgiu pro custu motivu. In presone in Inghilterra, a pustis chi dd’ant prelevadu dae s’ambasciada ecuadoriana in Londra, in ue fiat rifugiadu, est gherrende a livellu legale contra a s’estraditzione in Amèrica.
(gianni muroni)
Leave a comment