Ses chidas francu etzetziones. Est custu su tempus fissadu dae sa lege noa firmada dae su guvernadore de sa Flòrida Ron De Santis in contu de istrumìngiu. Coladu cussu tempus sas fèminas devent abarrare prìngias finas a sa nàschida de sa criadura. Chèrgiant o mancu. Su provedimentu aiat otènnidu sa majoria de sas duas càmeras de s’istadu, ambas duas controlladas dae sos republicanos, ma como devet retzire su pàrrere de sa Corte suprema istatale. Custu disinnu previdet sa dèroga s’in casu sa sa salude de sa fèmina siat in perìgulu (si at retzidu violèntzia b’at 15 chidas ma lu devet iscumproare). Custa cosa, a banda sas punnas reatzionàrias de sos desantianos a caddu in Flòrida, a su guvernadore li serbit finamentas in su disafiu internu, in intro de su partidu de s’elefante, contra a Donal Trump, bene pompadu dae sos cabos de incriminatzione a pustis de s’acontèssida “Stormy Daniels”. Custa lege li parat su pee a sas chi diant chèrrere seberare, e no a sas de Flòrida ebbia ma finamentas a sas de unos cantos àteros istados de su sud-est. In Alabama, Louisiana e Mississippi, pro nàrrere, in peruna fase de ingraidèntzia si podet istrumare. In Georgia finas a sa de ses chidas. Duncas sa Flòrida abarraiat una possibilidade pro chie non podiat istrumare in s’istadu suo. Finamentas ca una lege pretzedente, chi impediat sa possibilidade coladas sas 15 chidas, sa Corte la cuntesteit ca nât chi fiat lesiva de su diritu de privadesa chi nch’est in intro de sa Costitutzione de s’istadu. Como, pro chi sa Corte non fatzat sa matessi cosa, est possìbile chi sas Càmeras votent un’emendamentu a sa Costitutzione pro chi su diritu a sa privadesa siat partzidu dae sa legislatzione antiabortista. B’at de nàrrere chi sa Corte est orientada a dereta pro more de sas nòminas noas de De Santis, duncas est possìbile chi non b’apat impèigos pro sos guvernantes. Si pròpiu no aprovat custa est possìbile chi diat s’ok a sa lege pretzedente dende un’interpretatzione noa de sos diritos de sa privacy.
Màuru Piredda
Leave a comment