Si narat “ProssimaMente”. Sunt duas dies de connoschèntzia e cunfrontu de esperièntzias in su campu de sa pedagogia. Su 12 e su 13 de maju in Casteddu faghent sa de duas editziones
B’at in programma prus de 60 atividades: 40 laboratòrios e pràticas de comunidade, 10 seminàrios, 10 mustras e ispetàculos. Las ant a fàghere in s’ex Vetreria de Pirri, in sa Domo Saddi, in sa Galleria comunale de arte de Casteddu e in su campus de Tìscali Itàlia.
Finas in custa editzione at a èssere de importu sa reflessione subra de sas pràticas bonas ligadas a s’innovatzione in sos ambientes de iscola, pro sos cales su ministèriu de s’Istrutzione at prevìdidu de destinare una parte bona de sos fundos de su Pnrr.
Ant a esplorare sas potentzialidades de sos mèdios digitales, e s’isvilupu de ambientes relatzionales in intro de s’iscola. B’at finas un’interventu de s’Universidade de Miami, ghia mundiale in sos istùdios de sos disturbos de s’ispetru autìsticu, chi at a fàghere unu seminàriu subra de sas pràticas de ativare in classe cando b’at istudentes portadores de autismu.
Totu sas atividades las at amaniadas s’Istitutu Cumprensivu de Pirri 1 e 2, capu fila de unu progetu realizadu in collaboratzione con s’istitutu de carrera de Stoccolma, sos istitutos de istrutzione superiore “Giua”, “Buccari-Marconi”, “Duca degli Abruzzi” de Elmas, “G. Dessì” de Villaputzu, sos istitutos cumprensivos de Mògoro e Simaxis-Villaurbana, su CPIA 1 de Casteddu e sa retza regionale de sas iscolas “Senza Zaino”.
Bi leant parte finas delegatziones de istitutos iscolàsticos de àteras regiones. Un’agiudu a ProssimaMente benit puru dae s’Ufìtziu iscolàsticu regionale de Sardigna, chi at a cumbidare totu sas iscolas de s’ìsula.
(redatzione)
Leave a comment